Naannayas a translacion ti imahe ni Poong Jesus Nazareno

Black Nazarene procession

AGTULTULOY ti natibker a debosion dagiti minilion a deboto ken ni Poong Jesus Nazareno iti Quiapo, Manila kas ipaneknek ti naudi a pannakarambak ti piestana ken kaadu dagiti nakikaysa iti translacion wenno pannakaiprusision ti imahena idi Enero 9, 2020.

Naindaklan a pagyamanan iti Dios dagiti organizers ken deboto ni Poong Jesus Nazareno ti naannayas ken naurnos a pannakaisayangkat ti transalacion manipud iti Qurino Grandstand iti Rizal Park agingga iti simbaan wenno Minor Basilica of the Black Nazarene iti Quiapo ta nagpaut laeng daytoy iti nasurok a 16 nga oras. Nabibiit ngem kadagiti naglabas a tawen a kaaduanna ket nagbayag iti 18 – 22 nga oras. Nabibiit ti translacion gapu kadagiti nainget a security measures nga insayangkat dagiti 13,000 a kameng ti Philippine National Police, Armed Forces of the Philippines ken Philippine Coast Guard.

Nainget a ginuardiaan dagiti polis, military ken Coast Guard ti translacion. Nasurok a 2,000 polis ti nangbayabay iti andas wenno karro a nakaipalaunan ti nangisit nga imahe ni Apo Jesus kabayatan ti translacion. Naikkan met iti barikada a landok a binantayan dagiti polis dagiti nagdalanan iti transalacion a nangkontrol iti garaw dagiti deboto ken kadagiti naggandat a makaasideg ken makauli iti andas. Nainget met a napawilan dagiti aglako iti rota ti translacion ken iti aglawlaw iti simbaan iti Quiapo.

Iti laksid ti nainget a seguridad, napasamak latta ti nakaro a panagdudupudop ken panagbinbinraso dagiti deboto a nakipaset iti translacion iti regget ti gandatda a makauli iti andas tapno maaprusan ken mapunasanda ti imahe ni Poong Jesus Nazareno. Nasurok pay laeng a 400 dagiti naireport a nasugatan kabayatan ti prusision.

No man pay adu dagiti nangdayaw ken nagyaman iti nabibiit ken naan-annayas ti translacion ti imahe ni Poong Jesus Nazareno ita a tawen, nagduduma met dagiti negatibo a kritisismo dagiti deboto ken nakipaset iti narelihiusan a pasken. Krinitikarda ti panangbayabay dagiti adu a polis iti translacion a nangkontrol iti garaw dagiti deboto. Imbilang dagiti kritiko a deboto a ti security measures nga impakat dagiti polis iti translacion ket rinabsutna ti gundawayda a mangipakita ti nakaro a debosionda ken ni Poong Jesus Nazareno.  

Napalaus met ti panagyaman dagiti lider ti Simbaan, ken dagiti organizers ken dagiti napagustuan a deboto a nangdayaw iti natalged a pannakaangay ti translacion manipud iti alas-4:15 iti parbangon agingga iti alas-8:49 iti sardam. Nabibiit nga amang ngem kadagiti naglabas a translacion iti Mileneo, ken basbassit nga amang dagiti nadangran ken awan ti naisakripisio a biag.

Kalaksidan ti naannayas a translacion, nakalalagip ti kalkalpas a Piesta ni Poong Jesus Nazareno ta isu ti maudin a panagmisa ni Cardinal Luis Antonio Tagle kas Arsobispo iti Manila ta dinutokanen ni Santo Papa Francisco kas Prefect of the Evangelization of People sadiay Vatican, ket mangrugin iti baro nga akemna ita nga Enero. Iti homilia ni Cardinal Tagle, inkararaganna ti kappia iti Pilipinas, ken iti Middle East, ken ti kinatalged dagiti mangmangged a Pilipino sadiay ballasiw-taaw. 

Maibilang ti Piesta ni Poong Jesus Nazareno a kadakkelan a narelihiosuan a pasken iti Pilipinas ta mapattapatta nga agarup innem a milion dagiti nakipagpaset iti kaudian a panagrambak. Mapagsidsiddaawan iti lubong dagiti kaadu dagiti makikaykaysa iti translacion a saanda a bumdeng a madangranda basta laeng makaiggemda iti tali a naikamang iti imahe, wenno tapno makaulida iti andas ken maaprosanda wenno maipunasda ti panioda iti nangisit nga imahe ni Poong Jesus Nazareno.

Mapagsidsiddaawan met ti yaadu dagiti bilang dagiti deboto ken ni Poong Jesus Nazareno iti agdama a Milenio ta saan met a kastoy ti kaadu ken kapanatiko dagiti nagkauna a makikaykaysa iti translacion kadagiti nagkauna a dekada sakbay ti Tawen 2000. Mapapati a kaaduan kadakuada dagiti ordinario a tattao nga agdebdebosion gapu ta napatgan dagiti kararagda nangruna ti yiimbagda iti sakit ken panagdur-as ti kabibiagda.

Iti laksid ti panangilawlawag dagiti lider ti Iglesia Katolika iti Pilipinas a saan a nasken a mapan makilinnetlet iti translacion tapno maipakita ti debosion ken ni Poong Jesus Nazareno, adu latta dagiti mayat iti daytoy a kannawidan ken nagbalinen a tradision iti panagdebosion iti panaglabas dagiti adu a tawen.

Ti nangisit nga imahe ni Poong Jesus Nazareno a nagawit iti krus ket naggapu sadiay Acapulco, Guerrero, Mexico idi 1606, ken insangpet dagiti papadi a Recoletos iti Pilipinas. Ti panagdaydayaw iti imahe ket inaprobaran ni Papa Inocencio X idi 1650.   

Ti translacion ket nagramut iti naulimek a pannakayakar idi Tawen 1787 iti imahe ni Poong Jesus Nazareno manipud iti immuna a nagyananna iti Intramuros nga ayan itan ti Rizal Park, agingga iti simbaan iti Quiapo.

Iti panagbaliw ti kasasaad ti seguridad iti lubong, nangruna iti agtultuloy a pangta iti terorismo dagiti religious fundamentalists wenno Islamic jihadists, saan a malibak a posible nga adda dagiti aggandat a manggandat nga agisayangkat iti kinadamsak kas ti panagbomba kabayatan ti translacion. Iti naglabas, napasamaken ti suicide bombing iti katedral sadiay Jolo, Sulu kabayatan ti Misa a nakatayan dagiti tattao.

Iti pannakaipakat iti nainget a security measures iti kaudian a translacion ni Poong Jesus Nazareno iti Quiapo, maawatan koma daytoy dagiti saan a napagustuan a deboto. Aklonenda koma a ti inaramid dagiti polis ken militar a panangistrikto ket para ti seguridad ken pagimbagan dagiti nakipagpaset a deboto ta awan ti makasinunuo iti pangta ti terorismo.