Naaresto a drug personality, nanayonan dagiti kasona

CAOAYAN, Ilocos Sur – Dua a kaso ti manamnama a mainayon a sanguen ti maysa a drug personality kalpasan a nakasamsam dagiti mangaresto kenkuana a polis iti droga ken paltog.

Idi rikisaen dagiti polis ni Ernesto Favis y Tutor, 25, residente iti Barangay 5, Vigan City kalpasan nga arestarenda idi rabii ti Septiembre 14 sadiay Barangay Don Lorenzo Querubin, ditoy nga ili, nakasukainda iti ikut ti suspek iti uppat a heat sealed a plastic sachet a naglaon iti mapapati a shabu, maysa a Cal. 22 revolver nga awanan iti serial number a nagkarga iti dua a bala iti chamberna, ken drug paraphernalia.

Maipalagip nga idi agarup 9:20 iti rabii ti Septiembre 14, napan arestaren dagiti nagtitipon nga elemento ti kapolisan a pakaibilangan ti CIDG Ilocos Sur, Caoayan Police Station, PIDMB, ISPAIDSOTG ken PIB, Ilocos Sur PPO ni Favis babaen ti bileg ti warrant of arrest nga inyisio ni Judge Marita B. Balloguing ti Regional Trial Court, Branch 20 ti Vigan City,

Naibilin ti pannakaaresto ni Favis mainaig iti kasona a panaglabsing iti Article V, Sec. 28(i) ti R.A. 10591 a nai-docket iti babaen ti Criminal Case No. 7710-V-2015; panaglabsing iti Article 2, Section 12 ti R.A. 9165 a nai-docket iti babaen ti Criminal Case No. 7712-V-2015 ken panaglabsing iti Article 2, Section 11 iti R.A. 9165 a nai-docket iti babaen ti Criminal Case No. 7711-V-2015.
Nairekomenda ni Favis nga agpiansa iti P120,000.00 iti CC No. 7710-V-2015; P120,000.00 iti CC No. 7712-V-2015; ken P200,000.00 iti CC No. 7711-V-2015.

Karaman ti akusado iti target list ti PDEA RO1 a drug personality iti Ilocos Sur.#