Naasuk a makina dagiti traysikel, pasuktan ti Vigan City government

VIGAN CITY  – Kas paset iti programana a pannakalapped iti polusion ditoy siudad, impaulog ti city government ti  iskediul ti pannakasukat ti daan ken naasuk a makina dagiti agpaspasada a traysikel iti Metro Vigan.

Pinasingkedan ni City Councilor Everin Molina, chairman ti committee on transportation, nga addan iskediul a pannakasukat ti two-stroke engine dagiti daan a traysikel nga agpaspasada iti Metro Vigan iti 4-stroke engine kas paset ti programa ti gobierno ti siudad ditoy a pannakalapped iti polusion nga itden dagiti napuskol nga asuk a patauden dagiti two-stroke engines.

Kinuna ni Molina a panangsurot daytoy iti ordinansa a naaprobaran idi 2006, wenno “ An ordinance regulating the use of carbonated two-stroke engines by tricycles-for-hire in the City of Vigan”, ken kas panagtungpal iti Clean Air Act of 1999 a pannakaited iti responsibilidad iti lokal a gobierno ditoy a mangammo kadagiti problema iti aglawlaw kangrunaanna iti polusion.

Sakbayna, iti inwayat ti city council nga inbentario, naammuan a manipud September 11, 2007, adda  2,758 a tricycle-for-hire nga agrikrikos iti Metro Vigan a buklen dagiti lima nga ili a pakaibilangan ti Bantay – 798; San Vicente – 268; Sta. Catalina – 309; Caoayan – 281; ken Vigan City – 1,102.

Segun ken ni Molina, saan a panangmolestia kadagiti franchise holders a two-engine pay laeng ti  makina ti maipaspasada a traysikelda ti  pannaka-retrofit ti makinada wenno babaen ti direct injection technology ngem ketdi wagas  tapno maprotehiran ti salun-at dagiti umili manipud iti asuk dagiti lugan nga agpaspasada iti siudad.

Maibasar iti Resolusion #1 ti nasao a komite, nakaiskediul iti sumaganad ti panagsukat dagiti two-stroke engine iti 4-stroke engine:

Model 1972-1980, November 30, 2007; Model 1981-1984, December 31, 2007; Model 1985-1990, January 2008; Model 1991-1993, March 2008; Model 1994-1995 ,May 2008; Model 1996, June 2008; Model 1997-1998, September 2008; Model 1999-2000, November 2008; Model 2001, December 2008; Model 2002-2003, February 2009; ken Model 2004, March 2009

Kinuna ni  Molina, a maysa a rason a kanselaen ti siudad ti Vigan ti prangkisa ti saan a panangsurot dagiti franchise holders iti daytoy a paglintegan.#