Naatap latta ti Kappia?

Salaysay ni Rilo A. Bedo

 

 

KAPPIA. Talinaay. Kinaulimek. Awan ti riribuk a mapaspasamak. Adda panagiinnayat tunggal maysa. Maiturogmo ti nairut nga awan pagam-amkam.

Amintayo, dayta la ketdi ti ar-arapaapenna a magun-od, kailian. Saan kadi?

Ta asino met ti di mayat nga agnaed nga addaan kappia iti pagindeganna a pagilian? Asino met ti di mayat a makaturog a sitatalingenngen nga awan pagam-amkanna? Asino met ti di mayat nga addaan iti kappia ti kaungganna?

Ania ketdin a nagragsak ti agbiag no adda dayta kappia a makunkuna. Uray rigat la ti adda a panagbiag no siaarakup ti kappia kadatayo, saan a di magaburan daytoy ti isyo ti kinarigat. Ket di mapupuotan, agtubo ti panagrang-ay a mangipangato kadatayo.

Ngem sipud pay iti punganay a pakasaritaan ti ania man a pagilian, saan a di maaw-awan dayta panaggugubat, panagnginginnernger tapno laeng magun-od ti kayat nupay adu a kailian, pada a parsua ti masaktan ken maipatli.

Nangrugi a kastoy ti istruktura ti paggargarawan nga aglawlaw gapu iti di pannakakapkapnek ti tao iti adda kenkuana. No mabalin, iti inaldaw a panagbiagna, ad-adu pay ti maalana para iti bukodna a pagimbagan. Ken umadu pay ti masakupanna tapno makuna a nabileg.

Dagitoy a banag, isuda ti mangsindi iti mitsa ti di panagkikinnaawatan nga iti panagbayagna, mangpakayamkam iti apuy a mangpadapo iti panagkakabsat.

Saantayon nga umadayo iti bukodtayo a bagi. Naatap metten dayta a kappia iti kaunggan. Imbes nga agbalintayo nga instrumento ti kappia, datayo pay ti mangrubrob tapno agkayamkam ti ginnura. Pangarigan, adda maysa nga isyo  a simngay. Nupay awanantayo iti umiso nga armas, ta nagpannuraytayo laeng kadagiti nangngeg, nadamagtayo, ala, simmagpawtayon a kasla kalaingan. Nga umabot payen iti panangiludekludektayo iti maseknan.

Saan laeng a dayta. No nasair ti riknatayo iti maysa nga isyo, a pudno man met, ikalukagtayo latta ti mangsapul iti abut dayta a nakapasakit kadatayo agingga a bukodtayo a kakadua, pagbalinentayon a dakes tapno laeng masalbartayo ti bagbagitayo. Nagalas a kababalin a mangpakiro laeng iti situasion. Wen, adu latta dagiti ang-ang nga umalang-ang a dida ammo ti tangtang-abenna, kailian.

Dagitoy a parsua, isuda dagiti instrumento ti demonio tapno nalaklakana a mastrek ti templo a sagut kadatayo ti Dios. Sapay la koma ta mapungtilen daytoy nga ugali ti asinoman tapno adda dayta kappia nga agaludaid iti biagtayo.

Wen, adda daytoyen istruktura ti sosiedad sipud pay idi punganay. Kuna dagiti eksperto, saan a mabalbaliwan daytoy. Ket babaen ti panangarisit kadagiti napasamaken iti kallabes, mabalin a maibagatayo ti mabalin a mapasamak iti masakbayan.

Ta adda ngarud dayta istruktura a pagibasaran! Istruktura a pagsarmingan koma!

No kitaentayo met ti pagiliantayo, adun a riribuk ti nagpasaranna. Adun a gubat ti naglasatanna. Ket dagitoy, agtultuloy latta a mapaspasamak iti agdama.

A pagtamtammengan latta ti kappia. A pagpaspasugnodan latta ti puraw a kalapati a makipagdanggay koma iti nawaya a panagwagayway ti banderatayo.

Isu ngarud a di nakakaskasdaaw nga itay nabiit, rimmuar ti resulta ti maysa a panagadal a nakabase iti pagilian ti Australia—ti Institute for Economics and Peace—nga adda latta iti baba ti pagiliantayo no pagsasaritaan ti kasasaad ti kappia nga imet daytoy.

Agasem dayta maika-129 a puesto iti mapan a 162 a pagilian iti sibubukel a lubong? Anian a nagbaba! Immabot iti 2.37 ti Global Peace Index-tayo. Ti 1 a peace index ti kababaan iti ranggo. Maisupadi iti sistema ti edukasion a no uno (1) ti gradom, isu ti kangatoan.

Kayatna a sawen daytoy, adda latta dita a makidangadangtayo para iti pannakagun-odtayo iti naan-anay a kappia.

(Adda tuloyna)