sinursuran-banner-sqSinursuranNi Jobert M. Pacnis

Ket ad-adda a naawatanna ida

NAGSUSULPENG dagiti ubbingda, dayta ti ammona. Ken saanda pay nga agbasbasa a naimbag kadagiti leksionda.

Iti naunday metten a panawen a kaaddana iti dayta a pagadalan, ammonan ti galad dagiti adalanda. Maymaysa ti agpatpatak iti isipna: buongda iti ulo!

Naiduma la unay kadagiti immuna a nagbalinanna nga adipen ti tisa— nupay pribado dagidi a pagadalan, ken naggapu pay kadagiti nasulinek a baragay dagiti ubbingda, napaliiwna nga ammo dagitoy ti agdayaw, agtamed ken mangkita kadagiti leksionda.

Ngem itoy ketdin a nakaalaanna iti regular nga aytem, nariknana no kasano ti katangken ti ulo dagiti ubbing.

Aglalo ket napaneknekanna a dagiti dadduma, al-alaen pay dagiti nagannakda uray biddut dagiti annakda. Pampanuynoyanda dagitoy. Iturturongda laeng iti pakaisagmakanda iti masanguanan!

Ngem kas adipen ti tisa, matdada laeng kadagiti kaduana a mangpawayway iti pasensiada. Nga uray kasano ti pannakaipayat ti dayawda, susupusopanda daytoy iti pannakaawat. Ipagpagapuda, saan a gapu ta daytoy ti pagbiaganda, kadagiti dadduma a manakman met nga ubbingda. Mairamraman dagitoy no agpulkokda.

No agpaabakda, ania pay ti serbi ti sinapataanda?

ITI dayta nga aldaw, inlatangna ti aldawna a mangbisita kadagiti ubbingda. Kangrunaan dagiti adda iti Grado 7 nga adalanda. Sarungkaranna dagitoy kas paset ti mandato kadakuada. No makitada nga agngangabiten ti grado ti ubing, sarungkaranda daytoy tapno tulongan. Panawen ti pandemia ket awan ti maaramidanda no di ti mamalaybalay. Kayatna met dayta ta makitana ti ruprupa dagiti ubbingna iti Grado 7— a dina pay nakitkita ken am-ammo! Numona ket ita a tawen, bin-ig a Grado 7 dagiti isurona.

Adda pammilin dagiti lider iti probinsia a maiparit ti panagbalaybalay amangan ketdi no isuda pay ti agbalin a rangtay ti bayrus nga agwaras. Wenno makaalada ketdi iti bayrus iti daldalan wenno pagtaengan a sarungkaranda.

Ngem ania ngarud, paset ti trabahoda. Adda pammilin ti Departamentoda a masapul a masurot. Mangisayangkat ti makunkuna a home visitation. Imonitorda dagiti ubbingda a naka-modular class. Masapul nga adda Individual Monitoring Plan a maileppasda.

Ta inton magraduanda met kalpasan ti Tawen ti Panagklase, dagitoy nga inaramidda ti maysa a pakagupgopan ti gradoda. Ti agbalin a resulta, isunto ti pagbatayan ti gobierno no kasano kadakkel wenno kabassit ti maawatda a bonus (‘tay dakkel nga isyu a PBB wenno performance based bonus).

Asino ngarud ti mayat a bassit ti maawatna? Isu a kasta laengen ti panangikalukag ti tunggal pagadalan, kapaliiwanna dayta, tapno ngumato ti overall rating-da. Iti kasta, dakdakkel met laeng ti awatendanto a gunggona. (Nga itoy a tawen ket ‘tay pay laeng PBB-da idi Tawen 2019 ti yur-urayda!)

Nga uray maisakripisio ti kalidad ti edukasion, aglalo idi face-to-face pay laeng ti klase. No apay a maisakripisio ti kalidad ti edukasion, namin-anotayo metten a natratar dayta iti daytoy a kolum.

Kaal-alada iti dayta a Biernes dagiti maudi nga answer sheets dagiti ubbing kadagiti modules-da iti dayta a Maikadua a Kuarter. Agkompiutdanto manen kadagiti grado.

Iti dayta pay laeng a gundaway, ammodan no asino dagiti saan nga agbalin. Umuna ditan dagiti ubbing nga aleng-aleng laeng dagiti modules kadakuada. Dida agipaspasa kadagiti maipapaaramid kadakuada. Ken no agpasada man, PTB wenno para tungpal bilin a kunada. Addada pay ngarud naganda laeng ti insuratda iti papel. Makuna laeng nga adda ipasada. Ken tapno saan a makuna a didan agbasa.

Agmalem ti inlatangna a panangbisita kadagiti ubbingda nga agtaud kadagiti uppat a barangay iti aglawlaw ti pagadalanda. Kaaduan kadagitoy ti agnaed iti asideg ti karayan (iti babaet dagiti tata/nipa) ken baybay (iti amianan).

Iti maysa kadagiti binisitana, nasabatna ti ubingna iti eskinita. Mapan koma daytoy iti yan dagiti barkadana (nga idi agangay, naammuanna a tapno mapanda agkonek iti maysa a balay nga adda P2P a koneksionna iti internet). Inawisna daytoy iti balayda.

Dita a nakitana no kasano ti kasasaadda. Ti laeng apongna a baket ken lakay ti kaduada nga agkabsat iti nakanumnumo a pagtaengan. Adda kano gayam dakkel a problema dagiti nagannak kadakuada isu a di dagitoy ti kabbalayda. Madama nga aglaga iti nipa (a kangrunaan a produktoda iti dayta a lugar) ti baket.

Kinuna ti baket kenkuana a maum-uman iti apokona. Dina maanawa iti panaglakuatsa daytoy. Pagaayat kano ti apokona ti mapan agay-ayam iti ML ken PUBG. Wenno agbarbarangay iti karayan sumagmamano metro la iti abagatanda.

Nasayaat koma kano laeng no sungbatanna nga umuna dagiti modules-na. Isu a di kanon nagal-ala kadagiti simmaruno a modules ta di met laeng sanguen ti apokona.

“Pumasanto kano latta, mistro,” dayta ti dina ninamnama a sungbat ni apong baket a kasangsangona. “Nabuyana ngamin iti telebision a kuna kano dagiti kongresman wenno senador sa itay, rumbeng kano nga ipasa amin dagiti ubbing ita a panawen ti pandemia.”

Apagapaman laeng a naklaat. Nabuyana met idi dayta a damag. Ngem dagus a rimsua dagiti isusupiat. Kasano laengen dagiti awan ti ar-aramidenda nga ubbing. Dagitay saan man laeng nga agipasa kadagiti rumbengda nga aramiden? Nagrenrolda lattan ket awtomatik a makapasadan? Saan a mabalin, a!

Wen, maawatan ti Departamentoda ti rigat a sasaaden iti agdama a pandemia. Ngem no mapalubosan ti kastoy a sistema, ad-adda nga awan pagturongan ti kalidad ti edukasion iti pagilian. Isudanto met laeng manen ti maitudo nga akimbasol.

Isu nga impetteng dagiti ngatuenda a di mabalin ti kasta. Passed ken Retained, dayta ti mabalinda nga ipatungpal. Awan ti Failed. Ket tapno maliklikan ti Failed, masapul a tarabayenda dagiti ubbing. Isu nga iwaywayatda ti home visitation. Agingga’t mabalin, ipariknada kadagiti ubbing a maum-uman nga ag-modules a masapul nga ituloyda tapno di masayang ti panawenda. Retained, isu daytay ubing a deisididon a di agtuloy. Awanen ti awatenna a sao wenno pammagbaga. Pati nagannakda, simmukodan!

Inlawlawagna ngarud iti ubingda, ken iti apo daytoy a baket, a saan a pudno ti nabuyana. Masapul nga annongenda ti akemda kas agad-adal tapno makapasada met laeng. Nagtungtung-ed dagiti agapo kalpasanna.

Imbatianna kadagiti modules ti ubingda ta nagkari nga ituloyna met laeng ti agbasa, ti agaramid kadagiti maipaobra kenkuana.

Maawatanna no apay a maaw-awan iti interes dagiti dadduma nga ubbing itoy a modular ti wagas ti panagbasa. Saanda met laeng a maaw-awatan no dadduma dagiti basbasaenda. Aglalo no is-isuda laeng— ‘tay awan ti maurayda a tulong kadagiti nagannakda ta saan met a nakabasa dagitoy.

Napaneknekanna dayta kadagiti dadduma nga ubbingda. Adda masapul a form a pirmaan dagiti nagannak kas pammaneknek a napan nagbisita. Dita a naimatanganna nga adda pay di makabasa iti insuratna a naganda tapno pirmaanda laengen iti ngatuenna. Ken saanda gayam a maisurat ti sibubukel a naganda.

No kasta ngarud, kasano a matarabayda dagiti annakda?

Isu a sangsangkamaysa ti nakuna dagiti nagannak kenkuana: nasaysayaat met laeng nga adayo ti F2F a panagklase.

Sapay koma kano, isuda nga adipen ti tisa, dida maum-uma kadagiti ubbing a naitalek kadakuada.

Napalalo ti yamyaman dagiti nagannak ta nayanusda a binisita, kinomusta ken tulongan dagiti annakda.

Iti naimatanganna– manipud iti kasasaad iti aspeto ti pinansial, relasion iti pamilia ken ti aglawlaw— kadagiti ubbingda, ad-adda manen a maawatanna dagitoy kadagiti imetda nga aw-awid. Masapul a ditada, kas mannursuro, a mangrugi no kasano a tubayenda dagitoy nga ubbing. Ubbing a naidumduma la unayen ngem idi panawenda. Ubbing nga isudanto ti sumaruno a mangiturong iti pagilian.