Naawis a makiinom, timmagbat

TAGUDIN, Ilocos Sur – Saanka a mapan makiinninom ta mabalin a daytoy pay ti pakaisarsarakam.

Leksion daytoy ni Esmenio Barnachea Jr. y Gavina, 40, naasawaan, mannalon, residente iti nadakamat a barangay gapu natagbatna ni Jerry Manzo y Collado, 35, awanan pagtrabahuan, ken kalugaranna,idi malem ti Hunio 15 iti Barangay Pudoc West ditoy nga ili.

Mismo a dagiti barangay officials ti nangiyawat ken ni Barnachea kadagiti nagresponde a polis kalpasan ti panangtagbat ni Barnachea ken ni Manzo.

Segun iti report, aggawid koman ti suspek idi agarup 11:30 iti nadakamat nga aldaw idi inayaban ti biktima sana inawis a makiinom.

Bayat ti panagiinomda, napasamak ti nabara nga argumento iti nagbaetan dagiti dua ket gapu iti daytoy, nagpakada ti suspek nga aggawiden ngem dinisnog ti biktima ti rupana.

Inasut ti suspek ti bunengna ket tinagbatna ti nadumaduma a paset ti bagi ti biktima.

Naitaray ti biktima iti Tagudin General Hospital and Capillariasis Center sa naiyalis iti Lorma Hospital iti San Fernando City..#