Nababa a presio ti tabako, nagbalin nga isyo iti eleksion

SAN JUAN, Ilocos Sur – Kinuna ni dati a Mayor Ben Sarmiento nga awan iti kontrolna ti presio ti tabako ditoy nga ili ket saksakayan laeng daytoy ti kasupangetna iti politika.

Kinuna ni Sarmiento nga awan ti pakaibianganna iti panaggatang ti TransManila Inc. iti naluto a bulong ti tabako iti San Juan kas ipabpabasol kenkuana ti kasupangetna iti politika.

Segun iti dati a mayor nupay agup-upa ti Trans Manila iti daga iti Barangay Camanggaan, awan ti pannakammona iti operasion ti nasao a trading center.

Kalpasan ti panaginana iti tallo a tawen, agkandidato manen ni Sarmiento para mayor ditoy nga ili.#