Nabagsol a fish vendor, delikado pay ti kasasaadna iti ospital

LAOAG CITY – Nupay naikkaten ti buneng a naiwekwek iti boksit ti maysa a fish vendor, adda pay laeng daytoy iti delikado a kasasaad.

Iti kaudian a report, naikkaten ti buneng a naiwekwek iti boksit ni Erwin Antonio, 50, residente iti Barangay 10, San Nicolas, Ilocos Norte, kalpasan ti naisayangkat nga operasionna, ngem segun dagiti doktor, adda pay peggad ti biagna.

Sakbayna, nabagsol ni Erwin bayat ti pannaturogna iti fish section ti tiendaan ti San Nicolas babaen ti kabsatna a ni Orlan.

Mapapati a nabartek ni Orlan a simmangpet iti balayda ket pimmanaw ni Erwin ken napan naturog iti puestoda iti tiendaan ngem sinaruno ti suspek sana binagsol.

Insuko ti maysa a retirado a polis ni Orlan iti PNP San Nicolas.

Mapapati a daytoyen ti maikadua a daras a binagsol ni Orlan ti kabsatna.

Saan a nailanad iti blotter no ania ti ramut ti nangbagsolan ti suspek iti kabsatna.#