Nabalitokan a kapanunotan, sagut dagiti bangolan (Maikalima a paset)

9) NAPADASAK MET TI NAGMAESTRO, sarita ni Lolo Matanda

Pakasaritaan ti naidumduma a maestro. Manipud iti panangrugina a panagiskuela idi sakbay ti Maika-2 a Gubat Sangalubongan agingga idi isun ti division supervisor ken ti panangisurona kadagiti kolehio ken panagbalinna nga administrador iti maysa nga eskuelaan.

Naidumduma a pakasaritaan ti maysa a titser. Kas pangulo, pinasiarna dagiti masakupanna tapno ammuenna no ania ti kasapulanda.

Kas administrador, inakemna a nalaing ti naited kenkuana a responsibilidad.

Naannayas dagiti pasamak. Natural ti lengguahe ti sarita. Naidumduma a sarita a nangdakamat iti lagip ti napalabas.

10) TI DULON, sarita ni Rosa Monte

Maipapan iti nagdulonan a daga, siempre. Adda sikap.

Napintas ti expectation ti sarita, ta saan a napasamak ti namnamaen a riribuk. Ngamin liniklikan ti author ti nangiparnuay iti damsak. Nagtaray ti sarita iti kinalinteg.

Naidumduma a developmental story a nasurat iti dramatiko a wagas.

11) MISSION ACCOMPLISHED, sarita ni Adaleyum Nhehe

Pakasaritaan iti ayat ken panagserbi.

Adda mission ti soldado, isu dayta ti pannakabomba ti yan dagiti rebelde. Ngem iti dayta a lugar ket yan met ti babai a sigud a kaayan-ayatna.

Napasamak ti mission. Nagkita dagiti dua. Ngem awanen ti bara ti beggang, ta ipangpangrunan ti soldado ti pamiliana.

Naurnos ken makapikapik dagiti eksena. Nagballigi ti author itoy a saritana.

12) GASAT, sarita ni Genoveva Gorospe

Labistori manen. Ngem nalaokan iti liput ken allillaw. Ketdi, iti udina dimteng ti pammakawan, nga isu ti tema ti sarita.

Naurnos dagiti pasamak. Natural met ti lengguahe.

13) BALLATEK TI NAPALABAS KEN PANAGBABAWI, sarita ni Tarantado

Nagpintas a sarita maipapan iti kriminal iti bukodna a pamilia. Gapu iti selos, napatay ti lalaki dagiti annakda. Naibalud. Idi nakaruar iti pagbaludan, nagsinnublianda latta iti asawana. Malaglagipda dagiti annakda itan ta baket ken lakaydan, nga awanen ti sanggirda.

Nakaur-urnos dagiti pasamak. Nagmayat ti panagistoria ti author kadagiti eksena. Makapnek.

14) IDI NAGKAPITAN NI APO SENIOR CITIZEN, sarita ni Husto Derecho.

Maipapan iti eleksion iti barangay. No adda mangabak adda met maabak. Ngem daydiay nangabak, inayabanna ketdi dagiti naabak a tumulong a mangrienda ti barangay. Ket rimmang-ay ti barangay. Naakawatda pay iti pammadayaw.

Anian, no matungpal la koma dagitoy a sirmata ti author kadagiti agngayangay a papili manen, awan koma ti panagaangat ken dumur-as la ketdi ti ili. Nagbileg a mensahe!

15. TI NLA GOLDEN JUBILARIANS, ni Amigo.

Pakasaritaan met kadagiti sigud nga agkakaeskuelaan. Napasamak ti reunion. Dimteng ti panaglaglagip kadagiti agkakapintas idi a bambanag. Ti agdama a balligi ti tunggal maysa.

Makuna a naragsak ken naballigi ti naiparang iti sarita. Makaay-ayo ti balligi dagiti agkakaeskuelaan. Ken nakakaapal.

Napintas ti idea ti author itoy nga insalipna. Makainspirar kadagiti agbasbasa a nasken nga igaedda pay ti panagbasada, ngamin ti edukasion ti tulbek ti narang-ay a biag.

PAKABUKLAN A KOMENTO DAGITI NAISALIP

1) Nabalitokan dagiti idea dagiti author

2) Nalaing nga agsurat iti sarita dagiti napagasatan a nangabak

3) Kadagiti dadduma, nupay napintas ti ideada, ken naurnos dagiti eksena, nasken nga adu pay ti danum nga inumenda tapno makaputarda iti sarita.

4) Ad-adu nga amang kadagiti naisalip iti nagkamtud kadagiti ramen iti maysa a sarita.

CONCLUSION:

Amin ket ammona iti nagistoria. Ngem ad-adu kadakuada ti di makasurat iti sarita ken agabel iti balabala. Kadagiti nalaing nga agabel iti balabala ken ammona dagiti ramen ti maysa a sarita, isuda ngarud ti napagasatan a nakaitedan kadagiti pammadayaw.

Kuna man ni E. M. Foster: A good fiction writer should be able to do both: TELL STORIES AND WEAVE PLOTS.

DAGITI PILIK: (Kapipintasan agingga iti napintas)

1. Ti Maudi a Mannakigubat
2. Kilabban
3. No Lumnek ti Init
4. Sika, Mayor Angelo, Tersiro
5. Ni Tata Emong Ken ti Kaikarianna a Lubong
6. Mission Accomplished
7. Ti Lawalawa iti Nagirig a Melina ken ti Kulibangbang
8. Ni Lolo Anong ken ti Balay a Bangonenna
9. Ti Dulon
10. Mae
11. Ballatek ti Napalabas ken Panagbabawi
12. Gasat
13. Napadasak Met ti Nagmaestro
14. Idi Nagkapitan ni Apo Senior Citizen
15. NLA Golden Jubilarians

Nakapudnoak koma.