Editorial: Nabarayuboy a panaggasto ti gobierno iti SEA Games | Tawid News Magazine - Weekly Ilocos News 📰

Nabarayuboy a panaggasto ti gobierno iti SEA Games

MAIKANATAD kadi nga iti sango dagiti agrurutap a problema ken kinarigat ti panagbiag dagiti kaaduan a Pilipino ket gumasto ti gobierno iti nasurok a P50 million para ti pannakabangon ti maseggedanto a “cauldron” kabayatan ti pannakaangay ti maika-30 a Southeast Asian Games iti Pilipinas?

Iti budget hearing iti Senado, impalgak ni Senate Minority Leader Franklin Drilon ti kritisismona iti pannakagastos ti gobierno iti nasurok a P50 million a pondo para ti pannakaipatakder ti higante a “cauldron” para ti pannakasindi ti “torch” sadiay New Clark City, Capas, Tarlac kabayatan ti SEA games ita a Nob. 30 – Dis. 11, 2019.

Krinitikar ni Drilon ti saan a maikanatad a pannakagasto ti nagdakkelan a pondo para laeng iti maminsan a pannakausar ti ibilangna a higante a kaldero. Inlawlawagna a P4.4 million ti gastos iti disenio ti cauldron nga inaramid ti pimmusayen a National Artist a ni Architect Francisco “Bobby” Mañosa; P13.4 million ti nagastos iti pundasion ti cauldron; ken P32 million para iti mismo a cauldron. Nairaurak pay nga adda wrist tag a P6 million ket no dagupen ket dumanon iti P55 million.

Impaganetget ni Drilon a maysa a million ti balor ti pannakabangon ti maysa a classroom ket makapatakder koman ti gobierno iti 50 a classroom iti pannakausar ti P50 million para iti cauldron. Impakaammona a nasurok a P6 billion ti pondo ti gobierno ti mausar iti pannakaangay ti SEA Games, ket P5 billion ti nayalokar manipud iti 2019 National Budget ken nanayonan iti P1 billion manipud iti Presidential Fund, ken adda pay P1 billion a donasion manipud iti pribado a sektor.

Impasingked ni Drilon a kiddawenna ti imbestigasion ti Senado iti pannakausar ti pondo a nayalokar iti Philipine Southeast Asian Games Organizing Committee (PHISGOC) nga idauluan ni House Speaker Allan Peter Cayetano. Nasdaaw ti Senador ti set-up ken panggep ti PHISGOC ta maysa dayta a private foundation, ngem dagiti opisial pakairamanan ni Speaker Cayetano ket agpapada nga opisial ti gobierno.

Impakaammona pay ti kaawan ti naan-anay a plano ti gobierno iti pannakabangon dagiti baro a pasdek ken pasilidad a pagtarusan dagiti delegado ken pagay-ayaman dagiti atleta kalpasan ti pannakaangay ti SEA Games sadiay New Clark City ta marigatanto ti gobierno iti tinawen a maintenance cost a P150 million – P200 million, ket amangan no agtinnagdanto laeng a “white elephants” agingga nga agdaan ken agrukopda.

Dinependeranen mismo da Presidente Rodrigo Duterte ken Speaker Cayetano nga awan ti kurapsion ken “overpriced” iti pannakabangon ti cauldron, ken nasken nga ipanakkel daytoy dagiti Pilipino ta binangon dayta ti National Artist. Impasingkedda nga ad-adu ti magun-od a benepisio dagiti Pilipino iti pannakaangay iti SEA Games iti Pilipinas ket rebbengna nga ipanakkel dagiti umili nangruna dagiti atleta. Impasingkedda nga addanto pay pakausaran dagiti pasdek ken pasilidad uray malpaston ti SEA Games ta dagita ket world class ken mayanatup iti international sports standard a mabalin a pagsanayan dagiti atleta, ken pakaangayanto manen dagiti dadakkel nga sporting events.

Kalpasan ti inrakurak ni Drilon, timpuar pay dagiti dadduma nga isyu mainaig kadagiti saan a nasisita ken nangingina a paggastosan iti SEA Games kas ti talent fee dagiti nalatak a performers iti panaglukat ken panagserra ti torneo.

Maibasar kadagiti classified information a nai-leak iti media, dagiti seremonia ken cultural events ket addaan iti budget a P642 million; ken venues creative, aesthetic and special events integrator ket P975.8 million.

Dagiti met entertainers nga agpabuya iti opening and closing ceremonies ket matangdananda iti P73.2 million. Naipadamag a ti grupo a Black-Eyed Peas ket umawat ti talent fee a nasurok a P26 million. Naiparuar pay a ti budget a nayalokar kadagiti volunteers ket dumanon iti P40 million – para iti volunteer Games time allowances, – P15.8 million; commemorative medals and supplies for volunteers, – P21.6 million; ken volunteer promotion and retention initiatives, – P1.8 million.

Naipadamag a ti SEA Games budget, a dagiti gastosen iti opening and closing ceremonies ket aggatad iti P1.6 billion, nasurok nga apagkapat iti kadagupan a P6 billion budget para ti SEA Games. Adu dagiti masdaaw ta iti kadagupan ti P6 billion a pondo para ti SEA Games iti Pilipinas ket saan a maipaay kadagiti atleta, ngem para ti panangsangaili iti torneo.

Napateg ti sports kadagiti Pilipino ta dakkel ti maipaayna iti dayaw dagiti umili no makipaset ken agkampeonda kadagiti internasional a torneo kas ti SEA Games. Ngem iti sango dagiti nagadu a nadagsen a problema ti Pilipinas, ania ti kapatgan a prioridad ti gobierno iti agdama? Binabarayuboy a panaggastos ti kadakkel ti pondo para ti SEA Games ditoy Pilipinas ta iti sango dagiti adu a napatpateg a kasapulan dagiti Pilipino nangruna dagiti napanglaw ket dependeran pay dagiti nangato nga opisial ti pannakabangon ti higante a kaldero a maminsan laeng a mausar.

Awan ti dakesna ti napintas a panagsangaili kadagiti bisita ta dayta la ket ngarud ti pakabigbigan dagiti Pilipino, ngem agpatingga koma laeng iti kabaelan dagiti Pilipino. No aggastos ti gobierno iti agsobsobra para ti panagsangaili iti SEA Games kabayatan a nagadu nga atleta dagiti awan ti nasayaat a pasilidad a pagsanayanda, nagadu dagiti napanglaw ti awanan iti pagtaengan, nagadu a masakit ti awan iti ospital a pagpaagasanda, ken nagadu nga estudiante nga awan iti tumutop a classroom a pagadalanda. No aguutang wenno agdadawat ti gobierno ti pagsangaili ken pagpatakderna kadagiti nangina a pasilidad para ti SEA Games ket nalawag a kinaparammag dayta.

Nakalkaldaang a panaggastos ta nagadu dagiti napanglaw nga awan payen ti maisaangda a nalaka a bagas kadagiti rugak a kalderoda, ngem gumasgastos ti gobierno iti higante a kaldero tapno makapagpanakkel laeng kadagiti bisita.

Iti laksid ti P6 billion a nayalokar iti PHISGOC, ken dagiti billion pay a pondo iti Philippine Sports Commission, agkaykaysa dagiti umili a magun-od dagiti Pilipino nga atleta iti adu a medalia tapno saan a masayang ti dakkel a pondo a gastosen ti gobierno ita a SEA Games.