Footer

Nabartek a laborer, nagpaturong iti paltog, nagkikil

SINAIT, Ilocos Sur – Agsakit ti ulo daytoy a laborer ta makasuan la ketdi gapu iti pannakatiliw iti ikutna ti maysa a paltog ken panagdawatna iti kuarta ken panangtungpana iti padana a laborer.

Segun iti report, idi agarup 6:30 ti malem ti Agosto 5, adda iti dalanna nga aggawid ni Manolito Ducusin y Arboliente, 44, married, laborer, ken residente iti Barangay Pug-os, Sinait, Ilocos  Sur idi nagbangen iti dalanna ni Stephen Jay Prades y Sablay, 22, baro, sa kellaat a tinungpana ni Ducusin ken dinawatan iti P5.00 idinto nga inuksotna ti paltogna sana pinaturongan daytoy.

Naginnagawan dagiti dua ti paltog agingga a narabsut ni Ducusin sana insuko kadagiti nagresponde a polis.

Agpada a naipan da Ducusin ken ni Prades iti Sinait District Hospital tapno maagasan dagiti dunorda.

Mapapati nga adda iti inpluensa ti arak ni Prades.

Naikustodia ti suspek iti police station agraman ti paltogna.#