NAGBUKEL, Ilocos Sur – Nakaam-amak daytoy a mannalon no makainom: aggagatel ti ramayna a kumalbit iti gatilio ti paltog.
Tiniliw dagiti polis ni Marlon Oliverio y Crisostomo, 33, naasawaan, mannalon, ken residente iti Barangay Mission, ditoy nga ili gapu iti panagpaputokna iti ere bayat ti panaggiinomda iti kalugaranna a ni Hilario Baga idi agarup 10:10 ti rabii ti Mayo 20.
Segun ken ni Barangay Kagawad Pedro Baptista y delos Santos, madama ti drinking spree da Oliverio ken ni Baga iti sanguanan ti balay ti naud-udi idi kellaat lattan a nagpaputok iti namindua a beses ti suspek.
Saan a narekobre dagiti polis ti paltog ni Oliverio.#