Nabartek a menor de edad, kinabil ti dua nga agtutubo

NARVACAN, Ilocos Sur – Naglak-am iti sugat iti barukong ti maysa a menor de edad kalpasan a  binagsol ti dua nga agtutubo iti sitio Laud-Karayan, barangay Quinnarayan iti daytoy nga ili.

Nainaganan ti biktima a ni Jefferson Inor, 17, residente iti nasao a barangay idinto a nabigbig dagiti suspek a da Jopel Tejada, 18, second year college, ken ni Romnick Quillopo, 18, kalugaran met laeng ti biktima.

Naammuan iti inbestigasion ti polis a madama nga agay-ay-aytam dagiti suspek iti basketbol idi simmangpet ti biktima a mapapati a nabartek ket binatona dagiti suspek.

Nagpudot ni Tejada ket dinanogna ti rupa ti biktima sana binagsol babaen ti kutsilio a mapapati nga impaima ni Quillopo.

Naitaray ti biktima ti Central Ilocos Sur District Hospital sa naiyalis iti Gabriela Silang General Hospital gapu iti sugat a linak-amna.#