Nabartek a Muslim, nangriribuk

STA. MARIA, Ilocos Sur – Agsakit la ketdi ti ulo daytoy a Muslim agsipud ta masaklangan iti kaso gapu ta armado a nangriribuk sadiay Barangay Poblacion Sur ditoy nga ili idi malem ti Mayo 14.

Nagresponde dagiti polis idi nakaawatda iti telephone call a maysa nga armado a lalaki a nabartek ti mangbasbassawang kadagiti lumugar iti Barangay Poblacion Sur.

Idi rinikisa dagiti polis ni Saripada Hadji Fatah, 42, aglaklako a Muslim, agdama a residente iti Poblacion Norte ditoy nga ili, nakasukainda iti Armscor Caliber 45 pistol nga adda maysa a kargana a bala iti chamber ken maysa a magasin a nagkarga iti 4 a bala.

Immuna a naipan ni Fatah iti Central Ilocos Sur District Hospital, Paratong, Narvacan para iti medical examination sa iti police station para iti umisu a disposision.#