Nabartek a nagprobokar, natagbat

SINAIT, Ilocos Sur – Nabartek a naggawid ket impangtana pay a papatayenna ti pamilia, nagtungpal la ket ngarud nga isu ti natagbat babaen ti bukodna nga ama.

Gapu iti sugatna iti tengnged ken bukotna, nayospital ni Edwin Reyes y Rasala, 39, naasawaan ken residente iti Barangay Sta. Cruz, Sinait, Ilocos Sur idinto a boluntario a simmuko ti amana a ni Bonifacio Reyes y Yadao, 66, mannalon, kadagiti pannakabagi ti linteg kalpasan a tinagbatna ti anakna.

Segun iti polis, naggawid iti agarup 9:50 iti bigat ti Abril 10 ni Edwin a nakaro ti bartekna ket kinariarna ti pamiliana a nakaiggem iti bolo.

Naginnagawanda iti amana ti bolo ket idi naagaw ti lakay, tinagbatna ti anak a nakadunoran ti tengnged ken likud daytoy.

Narekobre dagiti polis ti bolo nga agatiddog iti 20 pulgada karaman iti pagiggaman.#