Nabartek, bimmagsol

BANTAY, Ilocos Sur – Gapu iti arak, nakabagsol daytoy a lalaki ket kapilitan nga inareglona ti biktima babaen ti panangigastona ti pannakayospital daytoy tapno saanen a dumanon pay ti kaso iti korte.

Saanen a nagdarum pay ni Ernesto Bielza y Paat, 36, naasawaan, ken residente iti Zone 3 kalpasan nga inako ti nangbagsol kenkuana a ni Clifford Alonzo y Raqueño, 33, naasawaan, ken residente iti Zone 4, dagiti nagastosna iti pannakayospitalna.

Segun iti report, nabartek ni Alonzo ket nagprobokar iti sango ti balayda.

Pinatigmaanan dagiti nagresponde a polis a mapanen maturog ngem idi nakapanawdan, inasitgan ni Alonzo ni Bielza nga umin-inom iti arak iti asideg ti balay ti suspek sana binagsol iti makannawan a bicep daytoy.

Intaray dagiti immarayat ni Bielza iti Metro Vigan Cooperative Hospital idinto a naipan met ti suspek iti Gabriela Silang General Hospital para iti mediko-legal sakbay a naikustodia iti police station.#