Nabartek a mannalon, natakaw ti kuartana

ALILEM, Ilocos Sur – Nabartek daytoy iti inuman ket idi makariing, awanen ti kuartana isu nga inreportna ti suspetsaenna a kinainomna.

Iti reportna iti polis, kinuna ni Benny Gavina y Amoyen, naasawaan, 50, mannalon, ken residente iti Barangay Alilem Daya, a nariinganna nga awanen ti P45,000.00 a kuartana ket suspetsana nga innala ni Armando Bugtong y Mariano, 53, naasawaan, mannalon, ken residente iti Barangay Tucao, Alilem Daya ditoy nga ili.

Sakbayna, idi rabii ti Abril 28, naggiinom iti Salvador Batling’s tobacco leaf drier da Gavina, Jun Saringit, 43, ken Rolando Saringit, 17, agpada a mannalon, ken residente iti Barangay Pantar, Alilem Daya, ditoy nga ili .

Mapapati nga ipadulin koma ni Gavina ti kuartana kadagiti dua ngem simmangpet ni Bugtong ket nakitana ti panagbilangda iti kuarta.

Mapapati nga immuna a naggawid dagiti ag-Saringit ngem nabati ni Bugtong agingga iti nakaturog ni Gavina.

Nasarakan dagiti polis ti baseball cap ni Bugtong, maysa a metro ti kaadayona iti nagturogan ti biktima.#