Footer

Nabartek, nagprobokar, bimmagsol

TAGUDIN, Ilocos Sur – Saanmo nga anawaen ti agprobprobokar a nabartek ta sigurado a sika la ketdi ti pagdas-alan ti pungtotna a posible a pakaisagmakam.

Leksion daytoy ni Randy Penaredundo y Rolanes, 29, naasawaan, ken residente iti Barangay Pudoc East, nga ili agsipud ta nagtungpal ti ibaballaetna a mangpakalma iti nabartek ti panangbagsolna iti daytoy.

Naitaray ni Johny Lizardo y Natividad, 24, baro, awanan pagtrabahuan, kalugaran met laeng ti suspek, iti Tagudin General Hospital and Capillariasis Center ngem indeklara ti doktor a nangtaming kenkuana nga awanen ti biagna.

Naipaagas met ni Penaredundo iti Pacencia Gonzales Memorial Emergency Clinic.

Iti report manipud iti polis ditoy, adda mapan gatangen ti suspek iti tienda idi masabatna ti biktima a nabartek ken agprobprobokar.

Pinadas ti suspek a pinagkalma ti biktima ngem kinarit ketdi daytoy a puon ti nagsubanganda.

Nagtaray a naggawid ni Lizardo ket idi agsubli addan iggemna a tallo a buneng sana dinuklos ti suspek a nakasugatan ti muging daytoy.

Inasut ni Penaredundo ti imukona ket binagsolnan ti tian ti biktima.

Naipan ti biktima iti Lorente Funeral Homes para iti pannakaautopsiana.#