Nabartek, nakumpiskaan iti buneng, paltog

STO. DOMINGO, Ilocos Sur – Malaksid a nabartek daytoy a lalaki, armado pay a nasalamaan dagiti polis idi rabii ti Disiembre 4 sadiay Barangay Cabaritan ditoy nga ili. Resulta, makasuan la ketdi iti panaglabsing iti RA 10591.

Idi agarup 9:00 ti rabii ti nadakamat a petsa, bayat ti panagpatrolia da SPO4 Arnel Pando Tobia ken SPO1 Macario Rin Tacal iti Sto. Domingo Beach road, nasalamaanda ti Kawasaki Bajaj a motorsiklo a nakaparada iti tengnga ti kalsada ken pagtugtugawan ti nabartek a lalaki nga idi agangay ket nabigbig a maysa nga Edmar Tacdol ly Tablatin, 26, naasawaan, poultry helper ken residente iti Barangay Cabaritan.

Idi kumprontaen dagiti polis ti suspek, nakitada ti nakabalay a natirad a buneng iti siket daytoy kasta met iti maysa a homemade cal 5.56 (one pong) a naikabil iti sling bag.

Kinumpiska dagiti polis dagiti armas sada inkuyog ti suspek iti police station para iti umisu a disposision.#