BANTAY, Ilocos Sur – Binassawanganna ti kaarrubana bayat ti pannakabartekna, ket nakasarak la ket ngarud iti gaddilna.
Naiyospital iti Gabriela Silang General Hospital ni Freddie Madriaga y Pato, 44, naasawaan, laborer, ken residente iti Barangay Taleb gapu iti panangmalmalo kenkuana ti kaarrubana a ni Reynaldo Neri y Domenden, 36, naasawaan.
Mapapati a nabartek ni Madriaga ket binassawanganna ti suspek. Saan met a makalawlaw iti kelleb ti suspek ket rimmuar iti balayna a nakaiggem iti tubo sana minalmalona ti biktima a nagsagrapanna kadagiti dunor iti ulona ken nadumaduma a paset ti bagina.
Nupay kasta, rimmuar met laeng ti biktima kalpasan ti pannakataming dagiti sugatna.
Saan a nabirokan dagiti polis ti tubo a pinangmalo ti suspek iti biktima.#
