TAGUDIN, Ilocos Sur – Grabe ti sugat ti maysa a residente iti maysa a barangay ditoy kalpasan a rinagadi ti kabsatna a di nakateppel iti panagprobokarna.
Nainaganan ti biktima a ni Victor Carsula, 42, ken residente iti Barangay Becques ditoy idinto a ti kabsatna, ni Rodrigo Carsula, 40, ken residente iti Gen. Trias, Cavite, ti naitudo a suspek.
Naammuan iti inbestigasion ti polis a nabartek ti biktima ket nagturong iti pagtaengan ti kabsatna a babai a temporario a paggigianan ti suspek. Mapapati a prinobokar ti biktima ti kabsatna a lalaki. Inanawada ti biktima ngem nagpursar latta a simrek iti pagtaengan.
Di metten nakateppel ti suspek ket pinidutna ti ragadi nga agatiddog iti 21 a pulgada sana intagbat iti biktima.
Nasugatan ti akinkannigid a paset ti tengnged ti biktima ket naitaray iti balay pagagasan idiay La Union.
Boluntario a simmuko iti polis ti suspek.