Nabaybay-an a pasdek iti Heritage Village, kayat a gatangen ti city government

VIGAN CITY – Maysa a resolusion ti naidatag iti sangguniang panlungsod a mangted otorisasion iti mayor a manggatang iti maysa a nabaybay-an a pasdek iti ikub ti Heritage Village ditoy.

Kinuna ni Mayor Eva Marie S. Medina a kayat a gatangen ti city government ti tallo-kadsaaran a pasdek agsipud ta saan a pinatartarimaan ti akinkukua ket agbalbalin a peggad kadagiti agpasiar a turista iti Heritage Village gapu iti maam-amak a panagtinnag dagiti tarikayo ti nasao nga istruktura.

Kinuna met ni Bise Mayor Franz Ranches a kayat ti gobierno ti siudad a gatangen ti pasdek tapno mapapintasda pay ti Vigan aglalo iti aspeto ti turismo ken heritage conservation.#