Nabigbigen grupo ti lalaki a nangkabil iti kalugaranda

TAGUDIN, Ilocos Sur – Nabigbigen ti grupo dagiti lalaki a nanglugob iti kalugaranda a baro iti lamayan sadiay Barangay Bio ditoy nga ili idi rabii ti Nobiembre 24.

Nainaganan dagiti suspek a da Mark Reyn Troy Banayat Lutchina, 25, baro; Reynmart Banayat Lutchina, 23, baro; Cezar Lutchina, 43, naasawaan; Reynald Lutchina, 47, naasawaan; ken Clint Lutchina, 30, baro, residenteda amin iti Brgy. Bio Tagudin, Ilocos Sur.

Segun ken ni Leopoldo Acosta, tanod, nakitana ti isasangpet ni Cezar Lutchina ket pinang-orna ni Dharen Legaspi Britos, 24, iti kayo ngem naglaw-as. Naggubal dagiti dua ket timmaray ni Legaspi ngem kinamat dagiti kadua ni Cezar sada nagtitinnulong a nangkabil iti biktima.

Inuksot ni Dharen ti imukona sana binagsol ti makannigid a kilikili ti maysa kadagiti nangkabil kenkuana nga idi agangay ket nabigbig a ni Mark Reyn Troy Banayat Lutchina.

Naitaray da Mark ken Dharen a nagsagrap kadagiti dunor iti ulo ken makannawan a sakana iti Ilocos Sur District Hospital.

Iti pannakaisurat daytoy, naiyalis ni Mark Reyn iti Lorma Medical Hospital, San Fernando City, La Union idinto a mabirbirok dagiti dadduma pay a nangkabil ken ni Dharen.#