Nabileg pay ti Solid North?

SOLID NORTH. Maysa nga Ilocano block. Kayatna a sawen ti panagkaykaysa dagiti amin nga Ilokano iti maymaysa nga itandudo nga  ibutos.

Maysa a kultura ti solid north. Panagkaykaysa ni Ilokano manipud iti Rehion Uno, Dos, Tres, Cordillera ken uray iti Kamanilaan ken amin a paset ti pagilian a yan ni Ilokano. Sabali pay dagiti OFW ken dagiti agindegen iti sabali a pagilian. Ta nagwaras met ni Ilokano.

Addan daytoy a solid north uray idi panawen da nag-Presidente Elpidio Quirino.

Idi panawen ti panagtakem ni nag-Presidente Marcos, lalo pay a pimmigsa ti solid north ket naaddaan dagiti nabibileg a politiko a kas kada Aspiras, Ablan, Agbayani, Cendaña, Clave, Crisologo, Dupaya, Dy, Enrile, Estrella, Maceda, Ortega, Primicias, Valdez, Raquiza ken dadduma  pay a nagturay ken nangituray. Iti Marcos regime. Nasken nga armen nga  umuna ni agngayangay a para senador dagiti Ilokano. Ngamin, sangsangkamaysa ti ibutos daytoy a puli. Nabileg ti solid north. Asinoman a suportaranna a para senador, sigurado la ketdi a mangabak.

Ngem ti imas ken paitna, nagrikki ti solid north iti pannakarippuog daydi Presidente Marcos.

Ta kalpasan ti duapulo a tawen, nagbassit ti bilang dagiti timpuar nga Ilokano iti Senado iti pannakapatapuak iti poder ni daydi Presidente Marcos. Lalo ket Ilokano met laeng dagiti nangidaulo iti pannakapatapuak ti Ilocano strongman, da Gen. Fidel Ramos ken Juan Ponce Enrile.

Saan a narukod ti bileg ti solid north kadagiti naglabas a nasional eleksion gapu iti ikakayakay no di man panagduadua iti bilegna wenno di inikkan iti importansia.

Iti uneg ti duapulo a tawen, da laeng Enrile, Ramos, Flavier, (Alvarez ken Magsaysay?) ti nagngayangay iti nasional nga eleksion. Banag a saan nga  umanay a medida wenno pagibasaran iti kinabileg no adda pay ti solid north wenno awanen kalpasan ti rehimen ni Marcos. Ngamin, iti pannakapatapuak ni Marcos, nairaman met a nagudua ti butos ni Ilokano. Saan a maawagan a solid (north) wenno sangsangkamaysa ta naisandi ti nawaywaya ken nalawlawa a kapanunotan no ania ti rumbeng ken maiparbeng a keddeng.

Nasken a maipasngay manen ti solid north. Ngem iti pannakaipasngayna manen, kasapulan nga agpannuray ti maysa a politiko saan laeng iti makagargari a karisma ken napudno a panagserbi no di pay napaneknekan ti  panangidaulona babaen ti pannakaited kenkuana ti respeto, saan laeng nga iti lugarna no di pay iti sibubukel a kumonidad ni Ilokano, saan laeng nga iti Rehion Uno, Dos, Tres, Cordillera, ken iti sibubukel a pagilian no di pay iti sangalubongan.

Iti panagtaray ni Ilocos Sur Gov. Luis “Chavit” Singson para senador, matingiting ken maammuan no sibibiag pay, no adda pay laeng ti pagbutbutngan a puersa ti solid north.

Aggibusen ti takem ni Flavier ket nasken ti maysa wenno ad-adu pay  nga Ilokano iti Senado a kas pannakabagina. Isu nga itoy a gundaway, mabisin ni Ilokano iti kinaadda iti mangibagi kenkuana iti Senado.

Daytoy a pannakabisin ti taraon wenno mitsa iti ibabangon manen ti solid north. Iti kaanoman, saan a kayat ni Ilokano nga awan ti mangibagi kenkuana iti Senado.

Impasigurado uray dagiti kritiko ni Singson  ti suportada kenkuana, malaksid kadagiti amin a pulitiko iti amianan. Itoy a punto, adda manen dayta a panagkaykaysa ni Ilokano, kas iti panagkaykaysa iti tagnawa wenno panagtitinnulong; am-ammom man wenno saan, kabusor man wenno gayyem, nasken a makibinnadang ta maysa nga Ilokano. Ni Ilokano, dinanto pulos a baybay-an ti padana  nga Ilokano iti nagan ti imbag ken pagimbagan ti sapasap.

Nabileg pay ti solid north? Paliiwen ti resulta ti masungad nga eleksion nasional .

Iti biang ni Singson, saan laeng a ti solid north ti mangkibin kenkuana iti Senado no di pay ti liga dagiti probinsia a nangiyendorso kenkuana ken ti kinapopularna a kas kangrunaan a pigura iti pannakapatapuak ni Presidente Estrada. Gapu iti daytoy a kinapopularna, adda kenkuana ti kadakkelan a porsiento dagiti botante, dagiti agtutubo a nakaimatang iti inaramidna a kinabannuar.  Nailamina wenno di pay laeng naikkat ti naganna  kadagiti agtutubo. Agtaud ti kadakkelan a butosna manipud kadagiti agtutubo. Isu daytoy ti kangrunaan a rason no apay a kasapulan ti Team Unity ti presentena, gapu iti guyodna kadagiti agtutubo a botante. Asinoman a suportaran ti youth sector, sigurado a mangabak ta isuda ti kadakkelan a bilang dagiti botante.

Masurotan ngata ni Singson ti baddek dagiti Ilokano a naglatak ken nangidaulo iti Senado, kas kada  Senate president Camilo Osias ti La Union, Senate pro-tempore Prospero Sanidad ti Ilocos Sur, ken Senate president Quentin Paredes ti Abra? Paliiwen…