Nabileg ti kararag (Maudi a paset)

DANDANI ala una idi dumsaagkami iti San Fernando. Nagtaruskami iti paradaan ti Marcitas. Awan ti lugan. Nupay kasta, adda dyip nga agpa-Baguio. Naammuak nga agpatingga laeng ti lugan iti Sablan. Adu kano ti landslide. Dandanin mapunno ti lugan. Kas kadakami, sumang-atda met tapno mapanda kitaen dagiti patpatgenda.

“Siak laengen ti agtuloy,” nakunak ta napanunotko ti rigat ti magmagna a sumang-at. Manipud iti Sablan, aganay a duapulo a kilometro ti daliasaten agingga iti siudad.

Ngem impapilit ni baket ti isusurotna. Kabaelak ti magna, kinunana. Uray ni Jasper, impettengna ti isusurotna.

Kalpasan ti nakurang a maysa nga oras a panagdaliasatmi, nagsardeng ti lugan iti Sablan ta agsasallupangen dagiti landslide.

Rinugianmi ti sumang-at. Idi damo, nasurokkami a duapulo ngem idi maimatanganda dagiti ginampuon a daga a naigabor kadagiti kalsada, nagsublidan.

Bayat ti isasang-atmi, nakitak ti namsaakan ti ginggined: dagiti kalsada a nagrissuod ken nagrekka, dagiti narba ken natiritir a pagtaengan, dagiti kasla kadakkel ti balay a bato a nagtupak iti dalan. Daytoy kadi ti bales ti nakaparsuaan iti panagabuso dagiti tattao? nasaludsodko iti nakemko. Wenno maysa a pammalagip ti Dios kadagiti nakalipaten a parsuana a binulsek ti kinaagum, kinamanagimbubukod ken inadipenen ti sileng ti pirak ken immoralidad?

Awan pay maysa nga orasmi a nagna idi kellaat nga imbuang ti langit ti awitna a tudo. Nadaripespeskami.

Diak malagipen no namin-ano a naginanakami. Ti ammok, di pay nabaraan ti tugawmi no ar-arigen, dagdagekon ti asawak ken ti anakmi nga ituloymi ti agdaliasat. Inamakko ti pannakaamitmi iti sipnget iti dalan. Narigat ti agkarkarawa iti kasipngetan. Adu dagiti nadadael a linia ti komunikasion ken elektrisidad ket awan la ketdi ti silaw kadagiti malabsanmi a kabalbalayan.

Pimmigsa ti bayakabak. Siakon ti nagawit kadagiti bag ni baket ta di pay isu a dagensenda. No lumasatkami iti reggaay, sangkataliawko dagiti nagrungarong a bato iti bakras ti bantay amangan no agrissuodda.

Nagdadakkel dagiti linabag ti tudo nga agdisso iti rupak. Ngem kasla diak marikna ti bannogko ken ti lamiis a sumuknor iti susuopko. Maymaysa ti adda iti panunotko: no pannubok ti Mannakabalin daytoy kadakami, awatek iti amin a puso ken kararuak, naitanamitimko. Iti dayta a darikmat, intalekko ti amin iti Namarsua. Ammok a babaen Kenkuana, malasatmi dagiti peggad a daliasatenmi.

No adda masabatmi, sangkasaludsodko no kasano ti dalan a sang-atenmi. Maymaysa ti sungbatda: delikado dagiti rissuod a kalay-aten; nagalis ti nagkapitakan a kalsada ken di mapakpakadaan dagiti agtinnag a bato. Ammok a saanda nga agang-angaw. Agsangsangit payen dagiti masabatmi nga estudiante a babbai gapu ti rigat a nagpasaranda.

Nagkullayaw ti unegko idi makitak ti sumaruno a kalay-atenmi. Kasla kadakkel ti balay dagiti nagtutuon a bato a nanggabor iti kalsada. Iti baba, nakaun-uneg ti derraas!

Siak ti immuna ket simmurot dagiti agina. Sangkataliawko ti ngato. Namak payen no agreggaay? Wenno agrissud iti baba? Ngem pinatibkerko ti pakinakemko. Naitanamitimko: Agtalekak Kenka, Apo. Ammok a Dinakami baybay-an.

Kalpasan ti kasla nakaun-unday a panagdaliasatmi, nakadanonkami iti Lamtang. Ditoy ti nagurayanmi iti lugan. Ngem maymaysa ti agbiahe idinto a reprep dagiti agur-uray a pasahero.

Inseniasko ken baket a magmagnakamin. Panggepmi ti dumagas iti balay da Rebing, ti kaanakan ni baket nga agindeg iti Irisan, tapno suktanmi dagiti naslep a pagan-anaymi.

Ngem dikami pay nakaadayo idi makitak nga agkutimermeren ni baket. Uray ni Jasper, dina payen maikeppet ti bibigna. Lima nga orasen a nadaripespeskami iti tudo.

Nagsardengkami iti bassit a tienda ket nagpakpakaasikami a pabingayannakami iti napudot a kape. Pagyamanak ta inikkandakami. Saanda a pinabayadan.

Intuloymi manen ti nagna. Iti sang-atan, adda simmungad a lugan. Pinarak uray nakitak a saan a pangpasahero a lugan. Nagyamanak ta simmardeng.

Dimsaagkami iti asideg ti St. Vincent Church. manipud ditoy, nagtaksikami a nagpa-Tacay.

“Ni Daisy?” sinaludsodko a dagus idi apagtapogmi iti ridaw.

“Addaak ditoy, Daddy,” insungbatna.

Naammuanmi a karuruarna iti pagadalan idi agginggined. Nagtaray kano a kimmamang iti Burnham Park. Simmurot iti padana nga estudiante a babbai ket immianda iti parke. Nagpatnag a dida naturog. Karton kano ti inin-inutda a pinuoran tapno adda pagiwagsakda iti salemsem.

Saanen a nalapdan ni baket ti luana. Naakas met amin a dagensen ti barukongko.

Ngem kangrunaanna, naduktalak ti naun-uneg a kaipapanan daytoy dimteng a didigra. Naamirisko bayat ti isasang-at ken ikakalipkipmi kadagiti bakras ti bantay ti kinabassit ken kinanumok no maidilig iti nakaparsuaan a ginubbuay ti Mannakabalin nga Ima. Naduktalak met a nabileg nga igam ti kararag. Babaen ti kararag, simngay ti panagtalekko iti bagik ken panunotko nga adda Mannakabalin a Puersa a mangsaluad ken mangtarabay kaniak iti sanguanan ti peggad.

“No masapulnak, agtugtogka laeng ket addaak,” kuna ti Apo a mabasa iti Nasantuan a Libro. Nagkamangak iti Dios ket inimdengannak.#