Footer

NABUDOLBUDOL (Maudi a Paset)

MAS LALON ti siddaawko idi nakitak iti kaunaan a gundaway nga awan a pulos ti alahas a suotna. Ne, apayen?

“Naimbagankan san iti sakitmo a hepatitis, mari?” inrungiitko.

Kellaat ketdi a nagsangit.

“Ne, apayen, mari?”

“Awanen dagiti alahasko, mari! Sayang dagidiay!”

“Apay, ania ti napasamak? Naholdapka?”

“Saan!”

“Ket ania ngarud? Nakidnapka ket dagidiay alahasmo ti pinangdundonmo dayta  bagim?” naalak pay laeng met ti agangaw idinto ta sumaninglot ken pumanangresen iti asul a paniona.

“Idi kalman a napanak nagpasiar idiay downtown, adda tallo a babbai nga immasideg kaniak ket nagpatulongda no sadino ti gumatanganda iti baro a kotse. Madamdama, adda dua  pay nga  immasideg kadakami nga adda iggem ti maysa a bay-on. Daytoy man ti kuarta  nga igatangmi,” kinunada ket impasiripda kaniak ti bay-on. “Rineppet a kuarta! Naglalaingda a sumao. Diak ammon ti bagik ta idi kunada nga ipaiggemda ti sangabay-on a kuarta kaniak, nayatak metten. Ngem nasken kano nga itedko dagiti amin nga alahasko kadakuada tapno masinunuoda  a saanko nga itaray ti sangabay-on a kuartada. Mapanda la kano alaen ti kotseda  a nakaparking iti adayo bassit. Urayek kano ida ta ikkandakto iti porsientok no makagatangda iti baro a kotse. Diak ammo no apay a nayatak. Kasla ketdin nahipnotismoak.”

“Inuraymo ida?”

“Wen. Nabayag. Dua nga orasko ngatan a naguray kadakuada, isu a binukitkitak ti bay-on a naglaon iti rineppet a kuarta.  Natakuatak a ti laeng gayam akinrabaw ti pudno a kuarta idinto ta kinartib a pappapelen dagiti dadduma pay a nakabandel!” inrungaabnan.

Nabiktima ngarud iti Budol-budol gang, kinunak iti  bagik.

“Ania ngarud ti inaramidmon?”

“Nagpulongak kadagiti polis. Ngem saanmi a nasarakan dagidiay a mandurugas!”

“Ala, saan a bale, mari, ta  alahas laeng dagiti napukaw kenka. Nagasgasatka  nga adayo ngem dagiti dadduma, natakawanda la ngaruden, pinapatayda pay wenno nareypda,” pinangay-ayok.

“Pagungtannak la ketdi ni lakayko.”

“Ipalawagmo a nalaing kenkuana. Maawatannaka met ngata. Ibagam nga agbabawikan iti napasamakmo,” imbalakadko. “Ania ti gatangem?” pinangyaw-awankon iti saritaan.

“Umutangak man iti pipino,” kinuna. Dandaniak pay naltotan ta agbuena mano datao iti utang. Ngem inikkak lattan iti sangakilo a kiddawna. Ket nagpakadan.

No maminsan, saantayo a  dumngeg kadagiti patigmaan. Kaykayattayo a suroten dagiti pagragsakantayo. Ngem saan nga agnanayon a sisasango ti maysa a tao iti kinabaked ti aglawlawna ken iti bagina  ta dumteng met ti panawen a pannakaiyaw-awan ti alipuspos. Kas iti kumarik a nabudolbudol. No koma  ta  dimngeg iti patigmaan ti inana, saan  koma a naglak-am iti pannakaloko. Saan koma  a napukaw a kasla asuk dagiti alahasna a nagbanbannogan ti asawana .

Napateg la unay ti patigmaan. No saan a denggen ken suroten daytoy, pagbalinen koma a kas ballaag iti bagi tapno agannad ken mailiklik iti saan a naimbag nga aramid!#