Footer

Nabudolbudol (Umuna a Paset)

“SAANMO nga  ipasindayag ti adda kenka ta amangan no adda nasirsirib ngem sika ket alaenda dayta kenka,” nangngegko iti naminsan a kuna ti ina, ngem saan a  namati ti anak, ni Mari Victoria. Dayta ti gapuna a naisagmak.

“Kakaisuna nga adda, di usaren! Ania  ngarud ti serbida no maiduldulinda, saan, mari?” inkalbit  pay kaniak ni Mari Victoria ti sungbatna  iti inana. “No addada laeng iti aparador, amangan no agbuotda pay!”

“Ti ketdi kinahiligmo kadagiti alahas!” ingngayemngem ti inana.

 “Kasla ngarud di kontento ti biagko no awan ti nakakabit nga alahasko,” inyellek met anak.

“Wen met ketdi a, mari. Isuna laeng ta kaska la agsakiten iti hepatitis ta ne, nakayelyeloka metten, amaya!” insapitko met.

Nagrupanget. Uray dagiti dumdumngeg kadakami nga agtututtot iti sango ti pagtagilakuak iti nateng ken prutas.

“Ne, yelo amin a ramramay dagiti imam, dagiti pungupunguam, ti tengngedmo agraman dagiti lapayagmo ket nagadu ti yelo! Isu a nakayelyeloka ket kaslakan agsakit iti hepatitis!” inulitko.

Kellaat a naggarikgik idi nasirokna  ti angawko kenkuana. Ngamin, agraraay dagiti alahasna. Kasla krismas tri, kunam man. Agrurutap dagiti kakasla sabong ti paria a kuentasna ken dagiti pulserasna. Uppat kadagiti sangapulo a singsingna ti addaan iti dadakkel a bato. Dadakkel met ti bato  dagiti aritosna. Saanko nga ammo ti agkilatis kadagiti alahas ta diak naessem kadagitoy, isu a diak maibaga  no pudnoda wenno saan. Ngem pudno kano amin dagitoy ta insangpet ti lakayna idi nagbakasion manipud sadiay Saudi a pagtrabahoanna a kas draftsman.

“Agaluadka, mari, agkaiwaran dagiti baliktad ti bitukana.  Nalaing dagitoy a bumaliktad met iti utek. Saan a mamin-ano a puntiriaendaka,” impatigmaanko kenkuana.

Ngem dinak sinungbatan. Nalabit a saan a napateg kenkuana dagiti balakad ta napatpateg a maaramatna dagiti alahasna.

“Kadagiti napateg nga okasion ti pangisuotam kadagita, saan nga iti parparaangan wenno iti kalkalsada laeng idta downtown!” binagi  manen ti inana.

Ngem nagkatawa laeng ni Mari Victoria. 

Inaldaw a rummuar. Nakaespoting. Ngem iti naminsan a bigbigat a sumingsingising pay laeng ni Apo Init, ken agur-urnosak kadagiti tagilakok a nateng ken prutas,  nasdaawak ta nasapa nga immay iti tiendak. Ita  man pay? Kaadu ti aggatang (diak ammo no iranana) no umay  aggatang, agingagatang wenno umay makituttot.  Suotsuotna latta dagiti agrurutap nga alahasna.

Ngem, ita, naliday unay ti rupana a kasla makasangsangit.

(Maigibusto)