SANTA MARIA, Ilocos Sur – Maysa a lalaki ti nagtitinnulongan a binugbog ti tallo a tattao kalpasan a ginandat daytoy a bagsolen ti kinainomna iti barangay Baliw Daya ditoy.
Nabigbig ti biktima a ni Rubin Mateo, 30, ken residente iti Cabcaburao, Burgos, Ilocos Sur idinto a nainaganan dagiti nangbugbog kenkuana a da Dennis Dosono, 33, residente iti Tinaan, Santa Maria ken dagiti kakadduana a Joseph Ventura, 25, ken Federico Casaro, 26.
Naammuan iti inisial nga inbestigasion a napan nag-videoke da Mateo ken ni Dosono ken kakaduana ket kalpasanna, rimmuar ti suspek sana sinakayan ti motorsiklona ngem ginandat a bagsolen ti biktima. Nasiputan ti suspek ket inagawna ti kutsilio iti biktima sana dinanog daytoy. Rimmaman dagiti kakaduana a nangbugbog iti biktima.
Naitaray iti Central Ilocos Sur District Hospital ti biktima para iti pannakaagas kenkuana.
Di nailanad iti blotter no ania ti gapu a ginandat a bagsolen ti biktima ti suspek.