Nabulod a motorsiklo, naisalda

VIGAN CITY – Nagtalek daytoy biktima idi sublaten ti gayyemna ti motorsiklona ngem naammuanna laengen idi agangay nga insalda metten daytoy ti luganna ket dina maipulang ta awan met ti pangsakana.

Nagpulong ni Michael Aniceto Balbuena, 15, awanan asawa, ken residente iti Barangay San Julian Norte, ditoy siudad, a mapukpukaw ti Honda XRM 125 a motorsiklona a mapapati a sinublat ti gayyemna a ni Alvin Amistad, 23, awanan asawa, ken residente iti Barangay 6, Vigan City.

Kas maibatay iti police blotter a napetsaan Mayo 5, sinublat ni Amistad ken ni Michael ti motorsiklo a kukua ti kabsatna a ni Joyet Balbuena idi malem ti Abril 24 ngem saan metten nga insubli daytoy.

Naammuan laengen ni Michael nga insalda ni Amistad ti motorsiklo iti P6,000.00 ngem awan ti pangsakana.

Saan a nailanad iti blotter no sino ti nangisaldaan ni Amistad iti lugan.

Iti pannakaisurat daytoy, panggep ni Michael nga idarum ti gayyemna no saanna latta a masaka ti motorsiklo.#