Nabuntog a pannakaitrabaho dagiti proyekto, nadillaw

SINAIT, Ilocos Sur – Kalpasan ti pannakadillaw ti nabuntog a pannakatrabaho dagiti sumagmamano a proyekto ti gobierno munisipal ditoy, ninayonan ti kontraktor dagiti trabahadorna tapno pumardas ti pannakaipatakder ti  tiendaan, munisipio ken ti rural health center ditoy nga ili.

Nadillaw iti sangguniang bayan ditoy ti nabuntog a pannakaileppas ti tiendaan, ti rural health center ken ti munisipio.

Maymaysa a kontraktor ti nakaiyawatan  ti pannakabangon ti baro a tiendaan a napunduan iti P40 million, ti rehabilitasion ti rural health unit a napunduan iti P6 million ken ti munisipio a napunduan iti nasurok P7 million.

Napaayaban pay ni Engineer Nestor Ibarra ti Ibarra Construction iti sangguniang bayan tapno ipalawagna no apay a nabuntog ti pannakaitrabaho dagitoy a proyekto ti munisipio a pakairamanan ti RHU a dina naabut ti petsa a pannakaileppasna.

Kinuna met ni Vice Mayor Macugay  nga imbagana iti kontraktor a rumbeng a masurot ti manpower requirement tapno maileppas dagiti proyekto iti naituding a petsa a pannakaileppasda.#