Nadara a Lunes Santo

BANTAY, Ilocos Sur – Tallo nga aldaw sakbay ti pannakapaliiw ti Semana Santa, maysa a lalaki ti ginudas ti armado a lalaki sadiay Barangay Aggay ditoy nga ili idi rabii ti Marso 30.

Sinigurado ti gunman ti pannakagudas ni Jones Ragon y Belarmino, 33, naasawaan ken residente iti nadakamat a barangay kas maibatay iti kaadu dagiti kapsula ken buli a nasarakan dagiti inbestigador iti crime scene.

Nupay dagus a naitaray ti biktima iti Metro Vigan Cooperative Hospital, Bantay, naideklara a dead on arrival babaen ti nangtaming kenkuana a doktor gapu kadagiti grabe a sugatna iti nadumaduma a paset ti bagina.

Suspetsa ti kapolisan a saan a maymaysa a tao ti nangpaltog ken ni Ragon ta malaksid iti 13 a kapsula ken 2 nga slug a mapapati a nagtaud iti cal. 45, nakasarak ti SOCO team iti black holster iti nakapasamakan ti krimen.

Naammuan iti inisial a report nga agbuybuya ti biktima iti dado bayat ti lamay ti lelongna idi pinaltogan ti maysa a lalaki a mapattapatta nga agedad iti 45, kalalaingan ti pammagina, nakaaruat iti nangisit a t-shirt, short pant ken bull cap.

Kalpasan ti panangpaltog ti suspek ken ni Ragon, nagna a nagpadaya idinto a nagpaputok pay iti tangatang iti sumagmamano a beses sa nagsakay iti motorsiklo ken napakaskas nga immadayo.

Mapapati a sabali pay a lalaki a nakaaruat met laeng iti nangisit a t-sirt ti limtuad iti asideg ti crime scene ken nagpaltog iti tangatang iti naminsan sa naglibas iti saan nga ammo a direksion.

Kitkitaen ti kapolisan ti napalabas a kaso a nakainbolbaran ni Ragon no adda pakainaiganna iti pammapatay.#