Pammaltog nagmalem ti Sept. 9: 4 natay, maysa kritikal iti ospital

BANTAY, Ilocos Sur Nagbalin a nadara ditoy probinsia ti Septiembre 9, Biernes, gapu ta lima a tattao ti nagsasaruno a napaltogan a nakagudasan ti uppat idinto a kritikal ti kasasaad ti maysa iti ospital a nakaitarayanna.

Iti daytoy nga aldaw, nagudas ni Romeo Margate y Advincula, 48, chief tanod, residente iti Barangay Bantugo, Nagbukel; ni Nestor Gamata y Besidas, 57, naasawaan, tricycle driver, ken residente iti Barangay Cabaroan, Bantay, Ilocos Sur; ni Elmer Icari y Macugay, 36, naasawaan, construction worker ken residente iti Barangay Namnama, Sinait, Ilocos Sur; ken ni Marvin Yago y Villamar, 26, caretaker, ken residente iti Barangay Malamin, San Juan, Ilocos Sur.

Adda iti kritikal a kondision  iti Lorma Hospital, San Fernando City, La Union ni Jimmy Beligan y Asuit, 38, awanan asawa, empleado ti National Irrigation Administration, ken residente iti Barangay Cabugao, Suyo, Ilocos Sur.

Kadagiti biktima ti pammaltog, uppat ti nakalista iti drug watch list ti kapolisan iti bukodda a lugar, Ngem iti kaso ti napapatay a chief tanod, kinuna ti kapolisan nga awan pakainaiganna iti droga.

Agdagupen iti 25 dagiti napapatay a drug personalities iti probinsia sipud idi imbilin ni Presidente Rodrigo Duterte ti all-out war maikontra iti illegal a droga.

Immuna a naireport a napaltogan ni Margate a puon ti ipapatayna  idi agarup 6:45 ti agsapa iti daytoy nga aldaw.

Kas maibatay iti report, agdaldalus da Margate, ti asawana ken ti kayongna iti pinagayanda idi immasideg ti di nabigbig a suspek sana pinaltogan ti biktima.

Naitaray ni Margate iti Ilocos Sur District Hospital, Narvacan ngem indeklara ti doktor a nangtaming kenkuana a natayen.

Nakarekobre dagiti polis iti crime scene iti dua a kapsula a mapapati a nagtaud manipud iti cal. 5.56.

Simmaruno ti pammaltog  iti agarup 7:15 ti bigat iti national highway a sakup ti Zone 5, Bantay, Ilocos Sur, partikular iti sanguanan ti Petron Gasoline Station  a nakatayan ni Gamata.

Segun iti report, magmagna ni Gamata iti sanguanan ti nasao a gasoline station idi inabay dagiti suspek a naglugan iti Kawasaki Rouser nga awanan plate number sada pinaltogan ti biktima iti sumagmamano a beses.

Naglibas dagiti suspek a nagpadaya kalpasan ti pammaltog.

Intaray dagiti nagresponde a polis ni Gamate iti Metro Vigan Cooperative Hospital ngem indeklara ti doktor a nangtaming kenkuana a dead on arrival gapu kadagiti sugatna iti nadumaduma a paset ti bagina.

Iti pananproseso ti SOCO manipud iti Provincial Police Office, Bulag iti crime scene, nakarekobreda iti pito a kapsula a nagtaud iti cal. 45, 3 a deformed slug ken 2 a metallic fragments a naggapu met laeng iti isu a kalibre.

Karaman iti top ten drug pusher iti Bantay Police Station, boluntario a simmuko ni Gamate iti polis idi Hulio 13.

Naiwayat ti simmaruno a pammaltog sadiay Barangay Battog, Sinait idi agarup 1:20 ti bigat. Madama ti panagtrabaho ni Icari iti maipatpatakder a pasdek-negosio idi immasideg ti maysa a lalaki a nagaruat iti nangisit a bonete sana pinaltogan ti biktima iti sumagmamano a beses.

Dagus a naglugan ti di nabigbig a suspek iti nalabaga a kotse a nagpakaskas a nagpaabagatan.

Naitaray ni Icari iti Sto. Cristo Milagroso, Sinait ngem saanen a naidanon pay ti biagna gapu kadagiti sugatna iti nadumaduma a paset ti bagina.

Nakarekobre ti SOCO team iti crime scene iti pito a kapsula manipud iti cal. 5.56, ken maysa deformed slug.

Nakalista ni Icari iti drug watch list kas high value target level 2 iti Sinait police station ken boluntario a simmuko idi Hulio 21.

Kabayatanna, kritikal iti ospital ni Beligan kalpasan a pinaltogan dagiti nakahelmet a suspek a nakalugan iti di ammo a motorsiklo.

Masuspetsa nga am-ammo ni Beligan dagiti suspek agsipud ta kapatpatangna dagitoy idi kellaat a pinaltogan ti maysa iti sumagmamano a beses sada naglibas a nagpaabagatan.

Nagsagrap ti biktima kadagiti sugat iti pispis, tengnged ken sumagmamano a paset ti bagida ket maob-obserbar ti kasasaadna iti Lorma Hospital, San Fernando City, La Union a nakaitarayanna.

Awan ti narekobre dagiti imbestigador a naiputok a kapsula iti nakapasamakan ti krimen.

Karaman ni Beligan iti drug watch list ti Suyo Police Station.

Napasamak ti maikalima a pammaltog sadiay Barangay Resurreccion, San Juan, Ilocos Sur idi agarup alas 8:30 ti rabii.

Segun ken ni Edjie Guzman y Javier, 56, naasawaan, kalkalpasda a naginum ken ni Yago ket imbilinna ti panangidasar daytoy iti pangrabiida.

Bayat ti kaadda ni Icari iti kusina, nakangeg ni Guzman iti sumagmamano a kanalbuong ket nakitana laengen ti biktima a nakadalutaytay  ken daradara.

Naitaray ni Icari iti Pira Hospital, Cabugao ngem  naideklara a dead on arrival.

Pito a kapsula ken 4 a buli ti narekobre ti SOCO iti crime scene.

Masuspetsa a drug user ni Icari ngem saan a simmuko iti San Juan police station. (Tawid News Team)