Nadesgrasia a negosiante, DOA iti ospital

STA. DOMINGO, Ilocos Sur – Saanen a naidanon a sibibiag iti ospital ti maysa a babai a negosiante kalpasan a nadungpar iti motorsiklo sadiay Barangay Parada, ditoy nga ili idi sardam ti Hulio 1.

Impatay ni Emilia Ulogani y Tabutol, 57, awanan asawa, negosiante, ken residente iti Barangay San Basilio, Magsingal, Ilocos Sur, dagiti dunorna iti nadumaduma a paset ti biagna maigapu iti pannakadungparna iti motorsiklo a minaneho ni Edgar Rafanan y Pardo, 34, baro, ken residente iti Barangay San Julian, Magsingal, Ilocos Sur.

Naammuan iti inbestigasion dagiti polis nga aksidente a dinungpar ti SYM Bunos X motorcycle a minaneho ni Rafanan bayat a bumallasiw ti biktima iti kalsada.
Naitaray ni Ulogani iti Tolentino Clinic and Hospital ngem indeklara ti doktor a nangtaming kenkuana a dead on arrival.

Naipaagas met ni Rafanan iti Magsingal District Hospital sa naipan iti police station iti Sto. Domingo para iti umno a disposision.#