Nadisnog a mannalon, comatose iti ospital

SINAIT, Ilocos Sur – Awan pay puot ti maysa a mannalon iti ospital a pakatamtaminganna kalpasan ti panangdisnog kenkuana ti kalugaranna a barangay tanod idi rabii ti Oktubre 6.

Comatose iti Corpuz Clinic and Hospital ni Richard Tabieros y Campos, 39, naasawaan, mannalon, residente iti Barangay Tubigay gapu iti mapapati a pannakaitupa ti ulona iti sementado a kalsada kalpasan a dinisnog ni Ruben Cagaoas y Tabora, 50, naasawaan, barangay tanod, ken kalugaran ti biktima.

Segun iti report, mapapati a naggiinom ti suspek ken ti biktima iti maysa a kasangay idi adda nakasubang ti biktima.

Inanawa ni Cagaoas ni Tabieros ngem saan nga impangag ti naudi a nagtungpal iti nabara a panagsubangda.

Mapapati a nakarurod ti suspek ket dinanogna ti ulo ti biktima a nakadaleban daytoy ken nakaitupaan ti ulona iti kongkreto a kalsada.

Naitaray ti biktima iti Sinait District Hospital ngem napagawid met laeng.

Mapapati nga idi addan ni Tabieros iti balayda, nag-complain a nakaro ti sakit ti ulona isu nga impan dagiti kabagianna iti Corpuz Clinic and Hospital nga agdama a pakatamtaminganna nga awananen iti puot.

Naimbitaran ti tanod iti police station ditoy para iti pannakaimbestigana.#