Footer

Nadumaduma a sektor, nagmaymaysa kontra dengue

VIGAN CITY – Natratar dagiti nagduduma nga isyo mainaig iti dengue iti panagtitipon dagiti amin a mangtartarawidwid iti salun-at ken dagiti line agencies ti gobierno ken pribado a sektor iti provincial capitol idi Septiembre 30.

Karaman kadagiti napagpapatangan iti naangay a provincial dengue summit ti agdama a situasion ti dengue iti sibubukel a rehion uno ken iti Ilocos Sur, dagiti mabalin nga aramiden tapno malapdan ti panagwaras ti sakit, dagiti addang ti probinsia tapno maikkan iti naan-anay a solusion ti parikut, ti pannakaipasdek ti walking blood donor program ken dagiti agbalin a paset ti tunggal sektor iti pannakapugipog ti dengue.

Nagpirma dagiti nagatendar iti pledge of commitment para iti Local Control and Surveillance on Dengue (LCS) a nakailanadan ti nainget a pannakaikampania ti agduduma a wagas ti pannakaprebentar ken agduduma nga estratehia ti panangkontrol iti dengue, kasta met ti aktibo a partisipasion ti amin para iti madaras a pannakapaadda ti kasapulan a blood component no kasapulan dagiti pasiente babaen ti pannakaorganisar ken panagrekrut iti voluntary blood donor iti organisasion/ahensia wenno institusion a pakaikappengan.#