Nadumaduma nga opisina, simpaentayo: Gov. Ryan

VIGAN CITY – Kinuna ni Governor Ryan Singson nga umuna a tamingenna kadagiti umuna nga aldawna kas ama ti probinsia ti pannakasimpa dagiti nadumaduma nga opisina tapno sumaysayaat ti serbisio a maipaay kadagiti umili.

Kinuna ni Singson nga amin nga empleado iti kapitolio ket mangidatag iti courtesy resignation tapno nawaywaya dagiti hepe dagiti departamento a mangirekomenda dagiti mabati iti opisinada.

Innayon ni Singson a tugawandanto ken ni Mario Ruelos, hepe ti Human Resources and Management Office, a kitaen ti kasasaad dagiti nadumaduma nga opisina iti kapitolio idinto nga inyunay-unayna a maisubli dagiti empleado kadagiti naggapuanda a mother unit.

Kanaig daytoy, impakaammo ni Singson a dinutokanna ni Ryan Astom a kas tourism officer, ni Michael Chan a kas hepe ti provincial disaster risk reduction management office ken ni Cara Feredo Daquep a kas provincial administrator.

Kinuna pay ni Singson a ni Atty. Mhel Gigi Tesoro ti dinutokanna a kas provincial legal officer.

Kabayatanna, kinuna ni Vice Governor Deogracias Victor Savellano a madama ti pannakipatpatang ni Governor Singson kadagiti amin nga empleado ken hepe iti nasional ken provincial offices ken maad-adal dagiti maipakat a kapintasan a wagas a pangidanon iti nasayaat a serbisio kadagiti umili.

Kinuna ti bise gobernador nga addanto maangay a strategic planning workshop a pakipartisiparan dagiti amin nga opisina ti gobierno tapno maplano dagiti programa ti provincial government para iti sumaruno a tallo a tawen.

Kinuna ni Savellano a babaen ti nasao a workshop, maebaluar dagiti programa ti gobierno probinsial a nasayaat ti implementasionna kasta met dagiti programa a nakurang ti disseminationna.

Panggep ti gobierno probinsial nga angayen ti strategic planning workshop sadiay Baguio iti maudi a lawas ti Hulio.#