Nagan, retrato dagiti politiko, maiparit a maipaskil DPWH billboards

DAGUPAN CITY– Bayat ti yaasideg ti panawen ti panagkampania para iti eleksion a maangay inton umay a tawen, saanen nga ipalubos ti Department of Public Works and Highways a maipaskil ti nagan dagiti politiko kadagiti project billboards tapno saanda a maikkan iti libre a publisidad babaen ti kuarta manipud kadagiti agbubuis.

Daytoy ti impaganetget ni Engineer Victoria Visperas iti DPWH-2nd District Engineering Office bayat ti Pantongtongan Tayo a programa iti radio ti PIA Pangasinan.

Kinuna ni Visperas nga iparit ti Department Order No. 72 ti pannakaipaskil ti nagan ken retrato dagiti politiko kadagiti billboards ti proyekto inprastruktura ti gobierno.

Kinuna ni Visperas a laonen laeng dagiti project billboards ti DPWH ti nagan ti kontraktor, petsa a panangrugi ti proyekto, petsa a pannakalpas ti kontrata, mabusbos iti kontrata, nagan ti consultant, ti DPWH implementing office ken ti nagtaudan ti pondo ti proyekto.

Innayon ni Visperas a kasapulan nga ikabil dagiti mangiyimplementar nga opisina ti DPWH dagitoy iti amin a lugar a pakaiyimplementara ti proyekto para iti impormasion dagiti agbubuis nga umili.

Kinuna ti nasao ng opisial a maibilin pay kadagiti kontraktor a dida ikabil ti nagan wenno retrato dagiti politiko wenno political billboard kadagiti ekuipoda.

Impaganetgetna nga accountable dagiti kontraktor no salungasingenda daytoy a pammilin. (Manipud iti report ni April M. Montes/PIA-I, Pangasinan)