sinursuran-banner-sqSinursuranNi Jobert M. Pacnis

Nagares a panagsasao

NO kayatmo a maala ti talek ken rikna ti asino man, masapul a tanangem ti agsao. ‘Tay nalamuyot laeng. Saan a nagares! Uray kasano kapintas ti ibagam no adda gargares, sagsagursor ti pannakaisawangna, saanto a napintas ti panagsaadna iti maseknan.

Malagipna man dayta a sangkakuna idi ni tatangna—ni tatangna a hayskul laeng ti nalpasna.

A pudno man met nga inikkan ti biag ti amana dayta. Napaliiwna a naasideg dagiti kapurokanda iti amana. Kapatanganda daytoy nupay saan met a mapmapan iti kantina ti purok tapno makitintinnagay iti kada malem.

Napaneknekanna pay, a no ania ti sawen ni tatangnna, dakkel ti panagtalek dagiti kalugaranda. Aglalo la ngaruden no maipapan kadagiti isyu iti pagilian. Ken kadagiti damdamag maipapan iti panawen.

Iti purokda, patienda la unay ti palawag ni tatangna iti agbalin a kasasaad ti panawen no adda bagyona. Managdengngeg ngamin daytoy kadagiti damdamag iti transistor radiona. Di pay idi nga uso ti telebision iti purokda.

Malagipna la unay ti maysa a pagteng idi. Kuna dagiti dadduma a kalugaranda a pagnaan ida ti napigsa a bagyo. Laeng, ngimmato (iti batogda) ti dalanen ti allawig. Ngem impalawag ni tatangna a natalgeddan ta ngimmato nga agpayso ti bagyo. A kayatna a sawen, naam-amiananen ti panagalisna. Saan ngaruden a magna iti ilida.

Ket nalawlawagan dagiti kalugaranda no ania a kayat a sawen no ngimmato ti bagyo. Naikkat ti panagdandanagda.

Malagipna pay a no adda agriringgor, di agkikinnaawatan, iti lugarda, maysa ti amana nga awaganda (nupay saan met a lider) tapno pagkalmaenna ti situasion. Ket tungpalenda a dagus ti ibaga ni tatangna. Dakkel ti panagbainda kenkuana.

Iti ngarud panagdakkelna, sangkalagip ken sangkabiagna ti pannursuro ni tatangna. Iti ania man a situasion a pakaisungalngalanna, adda dita nga agingga’t mabalin, naalumanay laeng ti panagsasaona. Saan a nagares! Saan a nasagursor!

Ita la ngaruden ta intunda ti gasat iti panagisuro. Adu nga ubbing dagiti naidumduma ti panagug-ugalida. Ganggannaet iti kaaduan ti kinapakumbaba, kinanakem ken panagdayaw.

Dita a napanunotna a nalabit dagitoy nga ubbing ket produkto ti nakiro a pagtaengan. Produkto ida ti nasayyasayya a pamilia.

Gapu iti trabahona, napaneknekanna a dakkel ti maitulong ti indakdakkel a pannursuro ni tatangna. Nausarna daytoy kadagiti situasion iti ikub ken ruar ti pagadalan a yanna. Iti kasta, agtalinaed ti panagkikinnaawatan. Saan laeng a kadagiti ubbingda. Kasta met kadakuada nga adipen ti tisa.

Pagaammona a napateg la unay ti kaadda ti nairut a langenlangenda nga agkakadua. Iti nagan dagiti ubbingda.

Ket tulbek dayta kaadda ti naalumanay, nalamuyot a panagsasaritada. Ken panagsisinnukat iti kapanunotan. Saan nga agpipinnatayok iti isbo.

Ngem ania laengen ti pannakadismayana iti dayta a gundaway. No asino pay ti namnamaenda a mangisakit kadakuada, isu pay ti umun-una a mangrakrak kadakuada.

Namin-ano a nagsukaten ti superior-da. Nakitaanna dagiti immuna iti maysa a sao. Kinatao a rumbeng iti kas kadakuada. No adda pagbiddutanda idi, natanang laeng a kasarita ida dagitoy.

Ngem ita, iti baro a boss-da, naidumduma dagiti mapalpaliiwna— mapalpaliiwda nga agkakadua.

Adda gargares ti panagsasao ti boss-da! Nagubsang. Nasagursor!

Iti maysa a panagmimitingda, impalagip ti superiorda a saanda unay kadagiti ubbing. Iti kaadu ti linteg a mangsalsalaknib kadagitoy, baka isuda ti delikado no dida makateppel. No saandan a kabaelan nga iggaman ti riknada, rummuarda pay laeng. Agpalamiisda iti ulo. Agpaingda pay laeng iti office.

Wen met ngamin. Iti kinasuer dagiti adalan ita, baka makadissoda wenno makaisao iti di maitutop. Banag a pagbabawyanda iti udina. Mabalin a makasuanda. Kadaksan, baka maikkatda iti serbisio! Maipa-
tulpoda pay!

Kasta ngarud ti inaramidna iti klasena. Iti dayta nga agsapa, nakaro man unayen ti kinabastos nga ipakpakita dagiti ubbingna. Nagtepteppel iti kasta unay. Sangkapalagipna ti bagina nga agtanang latta. Kasta a kasta uray panagriknana, mabastos la unayen. Makaliplipak payen.

Ngem natanang latta a panagsasao ti namay-anna. Nupay kada minuto nga agsermonen!

Ngem awan latta. Kaskasdi a di mamingga ti kinabastos dagiti adalanna. Inkeddengna a rummuar laengen iti kuartoda. Iti dayta a gundaway a makapagteppel pay laeng!

Nagdiretso iti opisinada. Apagisu met nga adda ti superior-da iti ridaw. Dinamag daytoy no apay a rimmuar (ta kabatog laeng ti opisinada ti naggapuanna a kuarto). Imbagana ti napasamak.

Anian a pannakadismayana idi agsao ti boss-da: Paksiatenkano met gayam dagiti ubbingna. Sa dagus a nagturong daytoy iti kuarto a pinanawanna.

Napal-idan ti riknana. Di kad’ imbilbilin ti superior-da nga agteppelda? Apay a kasdiay ti panagsaona a kasla mamalbalaw payen?

No kasta met laeng, pagsaadanda pay? Ania ti surotenda?

Binukodanna laeng ti pait a nariknana. Ti ammona, agpatingga laeng dita ti mapaliiwna.

Adda bisitada iti dayta nga aldaw. Nangato a tao iti ili. Siempre, adda kadua daytoy.

Nanumo a merienda ti naisagana. Gapu ta adayoda iti sentro, no ania laeng ti lako nga adda iti kantina iti ruar ti pagadalan a kukua dagiti lot donor.

Idi makapanaw dagiti sangaili, impaisublina ketdin ti di nagaraw a maysa kadagiti merienda. Saan kano met a nagaraw!

Napawingiwing. Nupay inawat latta met ti akinkukua iti kantina, ammona a madi ti rikna dagitoy. Mabainda la nga agsao.

Nganngani manen kasta ti napasamak iti simmaruno a kaadda ti bisitada a nagtsek kadagiti dokumento ti pagadalanda. Naisakbay ti isasarungkar ti bisita. Ngem saan man laeng a nagpagatang iti maluto a pangaldaw wenno merienda la unay ti superior-da— a dati nga ub-ubraenda kadagiti naglabas a boss-da.

Ngannganin pangaldaw ngem awan pay laeng kutkuti ti superior-da. Agingga a dimteng pay dagiti sabali a bisita.

Gapu ta mapanen a pangaldaw, dagus a nagbilin ti superior-da. Mapanda kano agorder iti masida a para iti walo a tao. Ne, ket, awan met ti napia a maorder iti kantina iti aglawlaw. No di inabraw, nakadardaruy a balatong.

Napan a dagus ti naibaon. Kinuna ti boss-da a no agawid met la dagiti kassangpet, isublida dagiti dadduma nga order.

Apaglikud ti naibaon, nagpakada nga agpayso dagiti kassangpet idi maalada ti rantada a data. Idi nangngeg ti kaduada dayta, kinamakam daytoy ti naibaon nga agorder. Naimbag ta nakamakamna daytoy.

Anian dayta order a naalan sa maisublinto manen! Napangilangil laengen!

Saan la a dayta. Naladaw ti kaduada iti dayta nga agsapa. Nakita ti boss-da ti panagtatakder dagiti adbayseranna. Sinaludsod daytoy no ania ti klaseda ta isu ngamin a kanayon ti first period dagitoy.

Imbagana ti kaduada. Iti dayta nga aldaw, free day-da iti subject nga isursurona Uppat la ngamin nga aldaw daytoy.

Ammok, a, nga uppat nga aldaw ti subject-mo! naggares man a sao ti boss-da. Uray la napakiet.

Ania la unay ngata, aya, ti ikarkarona ta kasta ti panagsasao ti baro a boss-da?

Ket saan la a dagita ti nakapaneknekanna no kasano kagares, kagubsang ti panagsasao ti boss-da. Pati dagiti kakaduana, nakapadasda metten iti kakasta a pabalagbag a sao.

NAGARES a panagsasao. Gapu ngata nangato ti saad ti maseknan ket kasta laengen kabassit ti panagkitana kadakuada? Pagtungpalan ngarud ti institusionda no kasta?

Imbes nga ayat ti agtubo iti nagbabaetan, no kasta kagares a kanayon dagiti sao, ken pati aramid, saan nga adayo a maparnuay ti pannakasayyasayya.

Ket nalagipna ni tatangna a di nakalpas iti aldaw ngem makunana nga adda sursurona. Ti boss-da, nakaadal ngem awan ti sursurona? ●