Nagdispalko iti pondo, naaresto

STA. MARIA, Ilocos Sur – Inaresto itay nabiit ti nagtipon a police elements ti Ilocos Sur Criminal Investigation and Detection Group ken police station ditoy nga ili ti maysa a babai gapu iti panangdispalkona iti pondo a publiko.

Inaresto dagiti polis ni Violeta Dayap y Cruz, 65, nasawaan, ken residente iti Barangay Lingsat, babaen ti warrant of arrest nga inyisio ni Judge Gina Juan-Chan ti Regional Trial Court Branch 22, Narvacan.

Sumangsango ni Dayap iti kaso a Malversation of Public Funds a naipababaen iti Criminal Case No. 3998-N iti nadakamat a korte.

Nairekomenda nga agpiansa ni Dayap iti P40,000.00 para iti temporario a wayawayana.#