Nagduduma Nga Anggulo ken Ang Gulo Ti Paskua (Maudi a paset)

Komentario Ni Jaime M. Agpalo. Jr.

 

 

Kadagiti adda listaanda iti pautang, panawen metten ti panagsingirda. Ta adda latta daydiay pammati a saan a rumbeng a matawenan ti utang ta malas kano, kuna dagiti sidingan ti dilana. Kadagiti saan a pulos a nagbayad, “krismasmon!” kunamon a yibbet iti sakit ti nakemmo.   Ania ngarud, no adda suerte, adda met malas! Ibilangmo laengen a malas wenno pannakaabak dayta.

Makapamusiig laeng ta panawen met iti nalanay a pannakatuktok ti ridaw. No kitaem, grupo dagiti agiwarwaras iti sobre. Nagduduma met dagitoy nga agiwaras. Adda foundation, religious organization, religious sect, wenno ania la ditan a grupo wenno timpuyog wenno gunglo. Kaadduanna kadagitoy, no di pay ket isuda amin, ket saan a rehistrado iti SEC wenno di man la nangala iti permiso iti inda panagsolisit. Maibilang a panagsolisit daytoyen, saanen a pannakipaskua. Ti pay imasna, adu dagitoy a timpuyog wenno gunglo ti dimmayo laeng ta naggapuda iti sabali a lugar.

Pinagbalindan a panguartaan wenno pagur-uran iti kuarta ti Paskua. Adda kenkan no mangitedka, uray ta Paskua met!

Kadagiti balbalay, pinnintasan iti ikabit a parol. Pinnintasan iti ikabit a Christmas light. Pinnintasan ti Christmas tree. No mabalin ket pinnigsaan pay ket koma kadagiti musical Christmas lights. No napimpintas ti parolmo ngem kadagiti kaarrubam, mas sikatka, lalo pay nga agpayapay dagiti lapayagmo no daydayawenda. No napimpintas nga adayo ti Christmas lights ti balaymo ken arubayanmo ngem iti kaarrubam, mas dayawendaka. Pinnasikatan. Linnastogan. Isu nga aramidem met amin a kabaelam a mangpapintas iti balaymo ken arubayam. Lalo no kabaelam met nga igastosan. Lalo ket dimo met kayat ti paatiw. Karbengam latta nga aramiden ti kayatmo a mapasamak. Nawayaka latta a mangaramid no ania ti kayatmo ta bukodmo a tignay ken rikna ti panangpapintasmo iti balaymo ken arubayam.

Kadagiti agtutubo, panawen a kalakaan ti panangsibbol iti wen ni ading balasang.  Ta nalaka aya, ti agkrismas nga awan ti labna? Isu a makumikom met dagiti agtutubo a lallaki a manggun-od iti ayat ni agtutubo a babai. Adda pay mapasamak a benefit dance wenno social dance para iti gunglo. Ket ti mapastrek ti aramaten para iti Christmas ball.

Dagitoy laeng ti sumagmamano a madi wenno makapasugkar a mapasamak wenno eksena iti Paskua. Kadagiti pagiwarnak, radio, telebision ken internet ti kontra pelo ta kigtonennaka iti damag a panagngato manen ti krimen. Takaw. Sipdut. Dukot. Akyat-bahay. Salisi.

Naislas a bag wenno bulsa. Agaw-selpon. Bukas kotse. Budol-budol. Carnap.

Kidnap. Hulidap. Nawantutri iti kinaaybol a naam-ammo iti social networking site. Ken dadduma pay a kabulastogan.

Kadagiti natiliwan a nagaramid iti kabulastogan, saankan a masdaaw, ta unipormadon ti sungbat.

Replay, nagasgasen a rason wenno palusot. Napilitan laeng a nagaramid iti kasdiay, ngamin awan ti  igatangna iti pag-noche buena. Napilitan a nagaramid, ngamin awan ti igatangna iti pangregalona. Napilitan laeng a nagaramid… hmmn… tinawen a kastoyen, isu nga awanen ti pagsiddaawan. Ala, uray ta Paskua met, agpalabaskan amangan no malasenka pay no agpungtotka! Saan nga isuda ti mangbugkiaw iti espiritu ti Paskua a nagapon kenka ken iti pamiliam.

Kadagiti awanan a pulos, tay pulpulos, simple laeng ti solusion kadayta.  Iturogmon, a. Kalpasan ti dua nga aldaw, nalpasen dayta Paskua! Pasasaan ba at lilipas din yan! Asino ti makaammo no dika nagsagana? Dimo met ibagbaga! Di inka mangaarruban kadagiti adu ti saganana?

Ngem dagitoy ti saludsod ita. Ania ti kaskenan: ti panangisagana para iti bukod a bagi wenno ti panangisagana ti bagi iti pannakaselebrar iti piesta ti Mannubbot?

Ti piesta ti Paskua ket saanna a kayat a sawen nga adu ti makan, mainum ken ragragsak. Ala, manganka iti adu, uminumka iti adu, agragsakka iti nalabes idinto ta adda met dagiti mabisbisinan, mawaw ken agladladingit? Madi, saan?

Iti Ebanghelio ni Apostol Lucas 3:10-18, inkaskasaba ni Juan Mammuniag ti umadanin a yaay ti Mannubbot. Panangisagana iti yaayna.

Ania ti aramidenmi, kunkunada. Insungbat met ti Mammuniag: kadagiti addaan iti dua a kagay, masapul nga itedna ti maysa kadagiti awanan. Ti addaan iti  kanen, masapul a mangibingay. Saan koma nga agsingir dagiti agsingsingir iti buis iti nalabes. Ket kadagiti pay dadduma, iti saanda a pananggundaway tapno maaddaanda laeng iti kuarta.

Iti ababa a pannao, nakasentro ti tignay iti panangited iti ayat kadagiti agkasapulan ken ti panangisardeng kadagiti saan a nasayaat nga aramid. Ta iti panangselebrar iti Paskua ket panangisagana ti bagi iti piesta ti pannakaiyanak ti Mannubot.

Maisagana tapno mapabaro manen ti pammati. Isagana ti bagi, ken ti kararua nga umawat iti grasia. Isagana ti bagi para iti sabali manen a panagbalbaliw ken sabali pay a nataw-enan a panagdaliasat iti lubong.

Saan koma a napatpateg ti material a banag itoy a Paskua no di ket napatpateg koma nga adayo ti pangisagana iti naespirituan a bagi. Saan  koma a pagbalinen a komersial ti espiritu ti Paskua, no di ket aramaten para iti transpormasion wenno para iti panagbalbaliw ti bagi ken ti biag…

Alla ngarud, kablaawankayo iti Naimbag a Paskuayo Amin!#