Footer

Nagganas ti agbalin a senador, sika! (Maudi a paset)

Uray ta duapulo ket uppatda met laeng a senador idinto ta buklen ti tallopulo ket pito ti komite. Laeng ta no opposisionka, maysa laeng ti maiggamam. Easy money, kapid! Ket no ti committee on silence ti iniggaman ti maysa a senador, bingo, kapid! Ken dakdakkel pay ti liksab no ti “yes, ma’am, committee" ti iniggamanna, kapid.

Ngem daytoy ti kaiimasan iti amin a naimas, kapid: ti pork barrel! P200 million iti tinawen! Wenno taymis tri, di kad P600M ti pork barrelna agingga iti agturpos ti terminona!

Ala, saanen nga uso ita a panawen ti 10% SOP cut no di 35-45%. Ti nakakatkatawa, kapid, uray dagiti ghost project, adda pay laeng dayta nga SOP cut.

30% laeng ngata ti kittabna wenno nangatngato pay no agpabpabanglo pay laeng iti naganna, ngamin kayatna pay ti tumarayto manen. Iti tallo a tawen, adda ngarud kitana a P180-M manipud iti P600-M!

Naggapu laeng dayta iti pork barrel. Sabali pay dagiti pagsiriban no protektor kadagiti illegal logging, drug syndicate, gunrunning syndicate, smuggling, human smuggling, ken dadduma pay a katorpean nga aramid.

Isu nga uray P35.000.00 laeng ti sueldona iti makabulan, gumastos ti kandidato a para senador iti P100-M iti eleksion ta masubbotna met laeng dayta. Dakdakkel pay ti ganansiana. Kasta ngarud, kapid, ti logicna.

Kadagiti met nalaing nga agsumar kadagiti kalalaingan iti sinnumaran, agtarayda, tapno adda met ibulsada a campaign fund. Belat, kapid!  Agur-or iti pundo, ngem dina amin gastosen aglalo no ammonan a saan a sigurado a maabak. Agin-agin a tumaray. Isu nga adu dagiti lilibeg a kandidato tunggal eleksion. Kamatenda dayta campaign fund. Adu dagiti makabael nga agur-or iti campaign fund iti eleksion. Nalaka laeng daytoy kadakuada.

Nagganas ti agbalin a senador, ania, kapid? Isu a makitam ida a nakahelikopter nga agkampania. P60,000 per day dayta ngem tsiken pid no makaruar. No nakatugawen, adunto ti sumrek. Kasla lintegen ti imbudo. Sumrek amin, awanen ti rumuar.

Sangagasut a milion ti nagastosna idi eleksion? Ahuu, mano met laengen aya, dayta! Masukatan!

Ti rigatna, kuarta nga aggapu iti kaban ti ili ti pagtaudan dagita a panguartaan, kapid. Isu a kasla kayatkonsan ti agsangit. Isu nga adu ti marigrigat nga umili. Adu ti agpalpalama. Adu ti mapan agpatagabo iti ballasiw-taaw. Isu nga adu dagiti agbisin nga umili. Isu a bassit ti agbalin a mannursuro ta bassit ti sueldoda ken mapuoranda pay iti panawen ti eleksion. Isu nga nakisang ti siled a pagadalan dagiti estudiante. Isu a lasonglasong dagiti kalsada. Isu a marmarba dagiti rangtay. Isu a a mamirmiraut ni Pinoy.

Adda ngamin dagiti mangmangan iti para koma kenkuana!#