Nagikut iti droga, nakasuan

NARVACAN, Ilocos Sur – Nakasuan iti panaglabsing iti RA 9165 ti lalaki a natiliwan iti droga iti checkpoint sadiay Barangay Santa Lucia ditoy nga ili idi bigat ti Oktubre 24.

Napilaan iti provincial prosecutor’s office iti kaso a panaglabsing iti Section 11 ti Article II ti RA 9165 ni Raymund Damasco y Taculod, 32 naasawaan, ken residente iti nadakamat a barangay, ket nai-docket daytoy iti babaen ti NPS #I-03-INQ-13J-00150.

Maipalagip a pinasardeng dagiti polis ni Damasco iti checkpoint kalpasan a nakaawatda iti impormasion  manipud iti maysa nga asset nga adda berde a motorsiklo a nagkarga iti droga.

Iti panagrikisa dagiti polis, nakakumpiskada iti bassit a heat sealed plastic sachet a mapapati a nagkarga iti droga nga agdagsen iti .3 gramo ken aluminum foil iti compartment ti motorsiklo ti suspek ken sabali pay nga aluminum foil iti makannawan a bulsa ti pantalon daytoy.#