Nagisalda iti motorsiklo, nakasuan

VIGAN CITY – Sinublatna laeng ti motorsiklo ngem yan ti adatna, insaldana metten ti lugan a dina impakaammo iti akinkukua.

Gapu iti daytoy, naakusaran iti qualified theft iti City prosecutor’s office ni Joseph Monzon, 24, ken residente iti Barangay IV, ditoy siudad .

Sakbayna, pinaiblater ni Alwin Garcia y Sunio, 24, baro, ken residente iti Barangay Sagayaden, Cabugao, iti polce station ditoy nga idi agarup 4:00 ti malem ti Enero 24, 2014, sinublat ni Monzon ti motorsiklona a Lucky Star ngem manipud idi, saannan nga insubli ti lugan.

Kinuna ni Garcia a naammuanna laengen nga insalda ni Monzon ti motorsiklo iti saan a nainaganan a tao.

Nai-docket ti kaso a qualified theft maikontra ken ni Monzon iti babaen ti NPS No. I-14-INV-14E-00061.#