Footer

Nagkararagkami a maispalkami: naitawtaw a mangngalap

CABUGAO, Ilocos Sur – Uppat a rabii a nagkatangkatangda iti taaw ngem nagtalekda iti Dios babaen ti panagkararagda a makaawidda a sibibiag.

Daytoy ti bugas ti salaysay dagiti dua a mangngalap a naitawtaw manipud iti kabaybayan ti Sta. Cruz, Ilocos Sur agingga a naalawda iti paset a sakup ti Namruangan ditoy nga ili.

Nupay napigsa pay laeng ni Bladdy Gansaen, 33, residente ti Dili, Sta. Cruz, Ilocos Sur, nakapsut unayen ni Billo Doctolero, kalugaranna, idi itaray dagiti mangngalap iti Pira Clinic and Hospital ditoy gapu iti waw, bisin ken bannogda.

Kinuna ni Gansaen a timmapogda ken ni Doctolero iti baybay iti parbangon ti Hulio 12 ngem idi addadan iti taaw, bigla a naikkat ti pasaplak ti bangkada a puon ti nagballikiganna.

Uppat a rabii a nagkatangkatangda iti taaw nga awan ti impaunegda a taraon ken inumen, kinuna ni Gansaen.

Kinuna ni Gansaen a no agtudo, itayada ti ngiwatda tapno maep-ep ti wawda.

Kas insalaysay ni Gansaen, nagkatangkatang ti bilogda iti taaw, ket idi adda masaripatpatanda a balbalay, inikkatda ti nabatbati a pasaplak ti luganda ket daytoy ti inaramatda a nagpatawan nga agpaigid.

Nagpatnagda a nagpataw iti baybay.

Kinunana a napukawen ti kaduana ti namnamana a makalasatda pay ngem pinatibkerna ti pakinakem daytoy.

“Agkararagta, dinata baybay-an ti Apo,” pinangpapigsa ni Gansaen iti pakinakem ni Doctolero.

Kabigatanna, maysa a mangngalap nga agnagan iti Robert Rabe ti nakasalaw kadagiti dua ket daytoy ti nangitakdang kadakuada.

Kinuna ni Emily, asawa ni Gansaen, a nagdandanagda idi dida napasangpet ti asawana.a

“Nagsasangitkami… dikam makapangpanganen… nagkarkararagkami lattan…” kinuna ni Emily.

Daytoy ti maikapat a pannakaitawtaw ni Gansaen iti kabaybayan. Kaudian, segun kenkuana, itay napan a tawen.

Tallo metten a daras a nagsukat iti bilogna gapu ta napukaw wenno nadadaelda iti pannakaitawtawna iti baybay.

“Tumapogak latta ngem pasalputsalput laengen gapu iti pasadasko,” kinuna ni Gansaen.#