Nagkarawa, binagsolna nagresponde a tanod

CAOAYAN, ILOCOS SUR –  Maysa a barangay tanod iti Brgy. Villamar ditoy nga ili ti nabagsol idi rinespondeanna ti babai a mapapati a kinarawa ti suspek ti pribado a paset ti bagina.

Binigbig dagiti pulis ti suspek a ni Celso Quillopo y Abuyoan, agtawen iti 26, mangngalap ken agnaed iti barangay Puro iti isu met la a munisipalidad.

Innaganan met dagiti polis ti biktima nga isu ni Orlando Quemado y Llanes, agtawen iti 35, naasawaan ken maysa a barangay tanod.

Segun iti panagpalutpot dagiti polis, idi rabii ti Agosto 5, bandang alas onse ti rabii nagriaw a nagpaarayat  ni Marcelina Ragunjan y Ragamat, agtawen iti 60, naasawaan ken agnaed iti nasao a barangay gapu iti mapapati a panangkarawa ni Quillopo kaniana.

Idi sinitar ni Quemado ni Quillopo, nangasut ti suspek iti kutsilio sana binagsol iti namindua ti biktima a nakapuntaan ti luppo ken kilikilina.

Kinemmeg dagiti opisial ti barangay ti suspek sada impan iti kuerpo ti polisia. Saan a nasarakan ti armas ti suspek a mapapati nga imbellengna.

Iti pannakaisurat daytoy, maisagsaganan ti pannakaiyuli ti darum kontra iti suspek.#