Nagkasakay iti motorsiklo, napilidan

TAGUDIN, Ilocos Sur – Natay ti drayber ti motorsiklo idinto a grabe dagiti sugat ti insakayna idi mapapati a dinungpar ti luganda ti maysa a bus sadiay Barangay Paratong, Sta. Cruz, Ilocos Sur idi rabii ti Hunio 19.

Nabigbig ti natay a ni Joel Aguilar y Cacdac, naasawaan, mekaniko, idinto a grabe a nasugatan ni Francisco Aquino y Manaois, 28, baro, mekaniko, ken agpada a residente iti Del Pilar, Tagudin, Ilocos Sur.

Iti inisial a panagimbestiga dagiti polis, agpaabagatan a direksion ti Partas Bus a minaneho ni Rey Villarin y Rodriguez, 40, naasawaan, ken residente iti No. 8 Guico St., Barangay Sto. Niño, Binalonan, Pangasinan idinto a kasabatna ti Mio motorcycle  a minaneho ni Aguilar ken ti insakayna a ni Aquino idi mapasamak ti aksidente.

Segun iti drayber ti bus, agdaldaliasatda iti one way lane iti maar-aramid a rangtay iti nadakamat a lugar idi dinungpar ti kasabatna a motorsiklo ti pakdaar a naikabil iti liniana a nakaigapuan ti pannakaipalladawda iti kannigid a paset ti Partas partikular iti sirok ti kamaudi a makannigid a pilid ti bus.

Nagpreno ni Villarin ngem napilidan latta dagiti biktima.

Naitaray ni Aguilar ken ni Aquino iti Tagudin General Hospital, Bio, Tagudin ngem indeklara ti doktor a nangatendar kadakuada a dead on arrival ni Aguilar. Naiyalis ni Aquino iti Ilocos Training and Regional Medical Center para iti ad-adda pay a pannakaagasna.

Awan ti naireport a nadunor a pasahero ti Partas Bus.#