Nagkinnabil nga agkaseraan, nayospital

BANTAY, Ilocos Sur – Di panagkinnaawatan a pinakaro ti pannakabartek ti motibo iti panagringgor ti dua nga empleado a nagtungpal ti pannakayospitalda.

Iti report manipud iti polis ditoy, nagdinnangir da Herman Calpito y Casica, 34, baro, natibo ti Narvacan, Ilocos Sur ken McRae Valera y Blando. 32, naasawaan, ken residente iti Zone III, Bangued, Abra a puon ti nakayospitalanda.

Segun ken ni Calpito, madama nga agtetext iti ruar ti kaserada idi simmangpet ni Valera ket iti awan a rason, nangburak iti botelia ti Red Horse sana dinarup ni Calpito.

Nakirupak ni Calpito ket nagresulta iti pannakadunor ti akinngato a bibigna ken ti kannigid a lapayagna.

Nagsagrap met ni Valera iti dunor iti takiagna ken rupana.

Naitaray ni Calpito iti Gabriela Silang General Hospital idinto nga iti Metro Vigan Cooperative Hospital ken ni Valera.#