Nagkurimes iti naglakuan, imbuking ti CCTV

VIGAN CITY – Awan ti lusot daytoy a mannanakaw ta imbuking ti close circuit television camera ti panangkurimesna iti naglakuan ti maysa a negosio idi bigat ti Pebrero 7.

Iti pannakaisurat daytoy, birbiroken dagiti polis ni Rolando Pespes Perez Jr, 30, naasawaan, tricycle driver, ken residente iti Brgy, Guimod, Bantay, Ilocos Sur kalpasan a nakitada ti footage ti CCTV a simrek ti suspek iti pagtagilakuan sana kinurimes ti naglakuan.

Kas maibatay iti CCTV footage, idi agarup 5:31 ti bigat ti Pebrero 7, simrek ni Pespes iti Camino Uno a masarakan iti Quirino Boulevard, Barangay Tamag, Vigan City, a kukua ni Joseph Randolf Aniceto De Leon, 31, businessman a residente iti Brgy 2, Vigan City, Ilocos Sur, ket nagpammarang a kustomer.

Mapapati a nairidep ti cashier a ni Adrian Labrador Saguran, 26, naasawaan ken residente iti Brgy Raois, Vigan City, Ilocos Sur, ket kinurimes ni Pespes ti naglakuan a P4,200.00 a naidulin iti tupperware a naikabil iti sirok ti lamisaan ti cashier sa nagtaray a pimmanaw.

Nangiwayat ti polis iti manhunt operation maikontra iti suspek ngem saanda a nasapulan daytoy.

Nupay kasta, babaen ti footage ti CCTV kas ebidensia, isagsaganan ti polis ditoy ti kaso maikontra iti suspek.#