Naglaawlaaw a nabartek, nabagsol

VIGAN CITY – Gapu iti panaglaawlaaw ti maysa a nabartek, nakapungtot ti kaarrubana ket nagtungpal iti panagboksingda ken pannakabagsol ti nabartek idi rabii ti Abril 2 iti Barangay III ditoy siudad.

Naitaray iti Metro Vigan Cooperative Hospital ni Elpidio Plana y Pascua, 60, naasawaan ken residente iti Barangay III ditoy siudad para iti pannakaagas dagiti sugatna kalpasan a binagsol ni Francisco Damo y Damo, 52, naasawaan ken residente iti Barangay VI, Bantay, Ilocos Sur.

Iti inisial nga inbestigasion dagiti polis, naammuan a naglaawlaaw ni Plana iti uneg ti balayna gapu ta nabartek a mapapati a nakarurodan ni Damo ket kinaritna ti biktima a nagtungpal iti panagboksingda.

Mapapati a nangasut ni Damo ket binagsolna iti sumagmamano a daras ti biktima.

Dati a susik ti mapapati a ramut ti insidente.#