Naglaka ngem Nagrigat nga Aramiden

Ni Arlane P. Manzano-Ellorin

ITI daytoy a biag, adu dagiti bambanag a pakakumikomantayo. Problema amin dagiti saan a rumbeng agraman dagiti ditay’ pay nakitkita. Pagbalinentayo la unay a narigat ti sasaaden ti panagbiagtayo. A no pampanunoten, nagsimple ken naglaka a lasaten.

No adda nakabasol kadatayo, naglaka ti mangted pammakawan. “Wen, pakawanenka, dimonton ul-uliten.”

Di met nagsimple? Wen, ngem narigat nga aramiden, ta nalaka aya ngarud ti manglipat ken mangilakasa lattan iti nasakit a napalabas?

No datayo met ti nagbiddut, dumawat laeng iti pammakawan. “Sori, diakton ar-aramiden. Pakawanennak koman.”
Di met nagsimple? Wen, ngem narigat nga aramiden, ta nalaka aya ngarud ti mangisuko iti pride ken mangawat iti biddut?

“Kayatko ti kastoy ken kasdiay… gumatangakton’ adda kuartak.” “Masapulko daytoy ngem awan met igatangko, kasano itan?”

Agduma ti kayat ken masapul ngem no dadduma, mas ikkantayo ti pateg dagiti kayattayo.

Tapno magatang dagiti kasapulan iti umno a kanito, agurnongka! Naglaka, ngem narigat man met nga aramiden. Wen, ta saan nga agressat dagiti pagayatantayo.

Maikaniwas ti aglako iti maiparit nga agas ngem gapu ta kayatmo ti makakuarta iti dakkel a dika agling-et, inaramidmo latta.

Awan bibiangmo no adu ti masakbayan ti marakrak. Ti importante, adu ti kuartam a paglang-ay ken pagbisiom.

Nasayaat koma ti masakbayan dagiti agtutubo no saan a gapu iti droga, di met nagsimple koma? Nagrigat met ngamin ti mangpanunot iti pagsayaatan dagiti kaaduan. Wen, ta adu dagiti buklis ken managimbubukod!

Adda natambang a mangisaksakit kadagiti babassit a tattao ngem awan met laeng ti timmakder a tumulong iti pannakasolbar ti kaso… Nagbuteng dagiti saksi a lumtuad.

Naglaka koma ti rummuar a mangitudo kadagiti nagbasol, ngem narikut… narigat ti agkamali. Kayatmo ngarud ti sumaruno a tumangad iti barsanga?

Pumanawkan iti pitak a nakailaw-anam. Saan pay a naladaw ti amin tapno agbalbaliwka ket surotem ti nalawag a dalan nga agturong ken ni Apo.

Ngem apay a dika bumangon? Wen, ta rigatem ti mangabaruanan – ta mabutengka a mapaay manen. Ta nasaysayaat a naitibkolka lattan ngem ti maitibkolka manen.

Husto daytan. Mayaten! Adu la amin. An-annuem ti surokna, isunto met la nga isu!

Rigatentayo ti agbannog a mangaramid iti amin a kabaelantayo. No mabalin ti second class, apay nga aggastoka para iti first class? Iti kabarbaro ngem iti second hand?

Adda pimmatay iti kaarrubana gapu laeng iti sao a LANGGONG!

Nalapdan koma ti pammapatay no laeng koma nakapagpatangda a nasayaat ken nakapagpanunotda sakay a naaramid dagiti babak. Tsk, tsk! Nagrigat met ngamin ti mangtengngel iti pungtot – ti mangkontrol iti nangisit nga anniniwan ti kinadakes.

Ah, adu pay dagiti nalaka koma nga aramiden ngem gapu kadagiti adu a rason, narigat a pasamaken. No koma laeng pagbalinentayo a simple ti dalan ti biag a lasatentayo, nadardaras, naragragsak ken nataltalinaay koma ti panagdaliasattayo.

Wen, narigat ti agbalin a TAO; ngem no napasnek ti tarigagaytayo nga agbiag iti makapnek, nalaka ti AGPAKATAO. No koma laeng… #